بۇگىن، 23 ءساۋىر — ەلىمىزدە العاش رەت ۇلتتىق كىتاپ كۇنى تويلاندى.
بۇل مەرەكە 2024 جىلعى 29 ماۋسىمدا ۇكىمەتتىڭ قاۋلىسىمەن رەسمي تۇردە بەكىتىلىپ، بيىل العاش رەت كەڭ اۋقىمدا اتالىپ ءوتتى. مەرەكەنىڭ ماقساتى — كىتاپ وقۋعا قىزىعۋشىلىقتى ارتتىرىپ، اسىرەسە جاستار اراسىندا وقۋ مادەنيەتىن ناسيحاتتاۋ.
پرەزيدەنت قاسىم-جومارت توقاەۆ بىلتىر وتكەن ءۇشىنشى ۇلتتىق قۇرىلتايدا ەرەكشە ۇسىنىسىن مالىمدەگەن ەدى.
ء“بىز، ەڭ الدىمەن، جاستاردى كىتاپ وقۋعا باۋلۋىمىز كەرەك. سوندا، جاپپاي كىتاپ وقيتىن ۇلتقا اينالامىز،” — دەپ اتاپ وتكەن.
سول يگى باستامانىڭ ناتيجەسى رەتىندە ەلوردادا وتكەن سالتاناتتى جيىندا جىلدىڭ ۇزدىك كىتاپ جوبالارى مەن باسپالارى ماراپاتتالدى. ءىس-شاراعا قر پارلامەنتى ءماجىلىسىنىڭ توراعاسى ەرلان قوشانوۆ، قر مادەنيەت جانە اقپارات ءمينيسترى ايدا بالاەۆا، قر كىتاپ پالاتاسىنىڭ ديرەكتورى ءادىل قويتانوۆ، سونىمەن قاتار باسپاگەرلەر، ءماجىلىس دەپۋتاتتارى مەن زيالى قاۋىم وكىلدەرى قاتىستى.
33 جىلدىق تاريحى بار «اتامۇرا» باسپاسى بۇل جولى دا بيىكتەن كورىندى. كوپ جىلعى ەڭبەكتىڭ، ۇزدىكسىز ىزدەنىستىڭ ناتيجەسىندە «اتامۇرا» «جىلدىڭ ۇزدىك باسپاسى» اتالىمىن جەڭىپ الىپ، 2 ميلليون تەڭگە كولەمىندەگى سىياقىعا يە بولدى. ماراپاتتى قر كىتاپ پالاتاسىنىڭ ديرەكتورى ءادىل قاجەنبايۇلى قويتانوۆ تابىس ەتتى.
ايتا كەتەيىك، بۇل جەتىستىك — «اتامۇرا» كورپوراتسياسىنىڭ ساپالى ادەبيەتتەر مەن وقۋلىقتاردى ۇسىنۋداعى ۇزاق جىلعى كاسىبي ەڭبەگىنىڭ جەمىسى. تەك بيىلدىڭ وزىندە باسپا بىرنەشە جاڭا كىتاپ شىعارىپ، اۆتورلاردى قولداۋعا ۇلكەن ۇلەس قوستى.
«اتامۇرا» كورپوراتسياسىنىڭ پرەزيدەنتى راقىمعالي قۇل-مۇحاممەد ۇلتتىق كىتاپ كۇنى اياسىندا تاعى ءبىر قۋانىشتى جاڭالىقپەن ءبولىستى. ول “اتامۇرا” باسپاسىنىڭ اتىنان ەلىمىزدىڭ بارلىق كىتاپحانالارىنا قازاق كلاسسيكتەرىنىڭ ۇزدىك 1000 تۋىندىسىن تەگىن سىيعا تارتاتىنىن حابارلادى.
