ءماجىلىستىڭ جالپى وتىرىسىندا پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين دەپۋتاتتاردىڭ قاراۋىنا ەلدىڭ 2026-2028 جىلدارعا ارنالعان الەۋمەتتىك-ەكونوميكالىق دامۋ بولجامىن ەنگىزدى، دەپ حابارلايدى «ادىرنا» ءتىلشىسى.
«بازالىق نۇسقاعا سايكەس، 2026 جىلى جالپى ىشكى ءونىمنىڭ ناقتى ءوسۋى 5,4%-دى، 3 جىلداعى ورتاشا جىلدىق ءوسۋى 5,3%-دى قۇرايدى. نومينالدى جالپى ىشكى ءونىم 2026 جىلعى 183,8 ترلن تەڭگەدەن 2028 جىلى 229,8 ترلن تەڭگەگە دەيىن وسەدى. ەكونوميكانىڭ ءوسۋى ناقتى سەكتور مەن قىزمەت كورسەتۋ سالاسىنداعى ءوسۋدىڭ ەسەبىنەن قامتاماسىز ەتىلەدى»،- دەپ اتاپ ءوتتى ول.
جۇمانعاريننىڭ ايتۋىنشا، وڭدەۋ ونەركاسىبى 2028 جىلى ينۆەستيتسيالىق جوبالاردى جۇزەگە اسىرۋ ەسەبىنەن 6,6%-عا دەيىن وسپەك.
ء«ۇش جىلداعى ورتاشا ءوسىم تاۋ-كەن ونەركاسىبىندە – 2,8%-دى، اۋىل شارۋاشىلىعىندا – 3,9%-دى، قۇرىلىستا – 11%-دى، كولىك قىزمەتتەرىندە – 10,1%-دى، ساۋدادا – 6,7%-دى قۇرايدى. ەكسپورت 2026 جىلعى $77,1 ملرد-تان 2028 جىلى $83,7 ملرد-قا دەيىن، يمپورت $67,7 ملرد-تان $75,2 ملرد-قا دەيىن وسەدى دەپ بولجانۋدا»، — دەدى ۆيتسە-پرەمەر.
بۇل رەتتە ينفلياتسيا بولجامى 2026 جىلى 9-11%، 2027-2028 جىلدارى ورتاشا 6% دەڭگەيىندە ايقىندالعان. ماكروەكونوميكالىق كورسەتكىشتەردىڭ بولجامى نەگىزىندە 2026-2028 جىلدارعا ارنالعان بيۋدجەت پەن ۇلتتىق قور پارامەترلەرىنىڭ بولجامى قالىپتاستىرىلدى.
