قازاقستاندا ينفلياتسيا قارقىنى ارتىپ كەلەدى. ۇلتتىق بانكتىڭ مالىمەتىنشە، 2025 جىلعى ناۋرىزدا ەلدەگى جىلدىق ينفلياتسيا دەڭگەيى 10%-عا جەتكەن، دەپ حابارلايدى “ادىرنا” ۇلتتىق پورتالى.
ەلدىڭ 20 ءوڭىرىنىڭ 16-سىندا ينفلياتسيا ۇدەي تۇسكەن. ەڭ جوعارى كورسەتكىش استانا قالاسىندا تىركەلدى — 13,3%. ازىق-تۇلىك باعاسى ءبىر ايدا 1,1%-عا ءوسىپ، جىلدىق كورسەتكىش 6,5%-دان 7,6%-عا دەيىن كوتەرىلگەن. اسىرەسە، اقمولا وبلىسىندا جاعداي كۇردەلى — مۇندا ازىق-تۇلىك باعاسى ءبىر جىلدا 10,6%-عا قىمباتتاعان.
اقىلى قىزمەتتەر بويىنشا ءبىر ايداعى ءوسىم نەبارى 0,2% بولسا دا، جىلدىق ينفلياتسيا 14,3%-عا جەتكەن. باتىس قازاقستان وبلىسىندا قىزمەت قۇنىنىڭ ءوسۋى 19,1%-دى كورسەتىپ، ەل بويىنشا ەڭ جوعارى دەڭگەيدە تۇر.
جالپى العاندا، ەلىمىزدە 2025 جىلعى ناۋرىزدا ايلىق ينفلياتسيا 1,3%-دى قۇرادى. ساراپشىلار جىل سوڭىنا دەيىن ينفلياتسيا دەڭگەيى 10,6%-عا دەيىن جەتۋى مۇمكىن ەكەنىن بولجاپ وتىر.
