بۇگىن — قازاقستاننىڭ ەڭبەك سىڭىرگەن ءارتىسى، راديو الەمىنىڭ مايتالمانى، تالاي شاكىرتكە ۇلگى بولعان ساۋىق جاقانوۆانىڭ تۋعان كۇنى.
ول جارتى عاسىر بويى ەفيردە حالىققا تازا، مانەرلى، اسەرلى داۋىسىمەن قىزمەت ەتتى.
ساۋىق جاقانوۆا 1945 جىلى 11 اقپاندا قاراعاندى وبلىسى، جاڭاارقا اۋدانى، ەركىندىك اۋىلىندا دۇنيەگە كەلگەن. بۇگىندە 80 جاسقا تولدى. 1966 جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن ءتامامداپ، سول جىلى قازاق راديوسىنىڭ ديكتورى رەتىندە قىزمەتكە قابىلداندى.
ساۋىق جاقانوۆا راديونىڭ داۋىرلەگەن كەزەڭىندە تىڭدارمانعا ءار جاڭالىقتى ايقىن ديكتسيامەن، ەرەكشە مانەرمەن جەتكىزىپ وتىردى. ونىڭ داۋىسىن حالىق تۇنىق بۇلاقتىڭ سىلدىرىنا، سامال جەلدىڭ اۋەزىنە تەڭەدى. داۋىس ىرعاعى، ءسوز ساپتاۋى، ورفوەپيانى ساقتاۋى – ونىڭ كاسىبي دەڭگەيىنىڭ جوعارى بولعانىن كورسەتتى.
«راديو – تىڭداۋشىعا دىبىستاپ وقۋ، سويلەۋ ارقىلى جەتەتىن اقپارات قۇرالى. سوندىقتان ديكتوردىڭ داۋىسى ماڭىزدى. بۇرىن ديكتورلاردى ديكتسياسىنا، ءتىل تازالىعىنا، ىرعاق ەكپىنىنە قاراپ تاڭدايتىن»، – دەيدى ول.
ساۋىق جاقانوۆا تەك راديو ديكتورى عانا ەمەس، عالىم، ۇستاز، زەرتتەۋشى رەتىندە دە ۇلكەن ەڭبەك ەتتى.
1998 جىلدان باستاپ ت.جۇرگەنوۆ اتىنداعى قازاق ۇلتتىق ونەر اكادەمياسىندا ساحنالىق سويلەۋ پانىنەن ءدارىس بەردى.
2000 جىلدان بەرى ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىندە دارىسكەر، دوتسەنت بولدى.
شاكىرتتەرىنە سويلەۋ مادەنيەتىن ۇيرەتىپ، راديو مەن تەلەۆيدەنيە سالاسىندا دۇرىس سويلەۋدىڭ ماڭىزدىلىعىن ءتۇسىندىردى.
سونداي-اق، «سويلەۋ تەحنيكاسى» (2002), «جۇرگىزۋشىنىڭ سويلەۋ مادەنيەتى» (2004) كىتاپتارىن جازىپ، سويلەۋ ونەرىن دامىتۋعا ۇلەس قوستى.
1985 جىلى «قۇرمەت بەلگىسى» وردەنىمەن ماراپاتتالدى. 1995 جىلى قازاقستان رەسپۋبليكاسىنىڭ ەڭبەك سىڭىرگەن ءارتىسى اتاعىنا يە بولدى.
ساۋىق جاقانوۆانىڭ ەرەكشە داۋىسى قازاق راديوسىنىڭ «التىن قورىندا» ساقتاۋلى. ونىڭ ەفيردەگى ەڭبەگى، شاكىرتتەرىنە ۇيرەتكەن ءبىلىمى، ەڭبەگى – قازاق جۋرناليستيكاسى مەن مادەنيەتىنىڭ التىن قازىناسى.
ول – قازاق راديوسىنىڭ ساندۋعاشى، تىڭداۋشىنىڭ جۇرەگىنە جول تاپقان ديكتور.
