قىتايدىڭ تارباعاتاي ايماعىنان اتپەن ساپارعا شىققان جۇبايلار – قۋانبەك ءتۇسىپحانۇلى مەن جاينا ەركىنقىزى استاناعا جەتتى، دەپ حابارلايدى "ادىرنا" ۇلتتىق پورتالى Kazinform اگەنتتىگىنە سىلتەمە جاساپ.
ولار تارباعاتاي ايماعىنا قاراستى ساۋان اۋدانىنان 8 تامىز كۇنى اتتانعان. 74 كۇن بويى ات ۇستىندە بولعان قوس ساياحاتشى قازاقتىڭ كەڭ دالاسىن باسىپ ءوتىپ، سارىارقا تورىنە جەتتى. جالپى ءجۇرىپ وتكەن جول قاشىقتىعى 2 500 شاقىرىمنان اسادى.
"ويعا العان ۇلكەن ارمانىمىز ورىندالدى. بۇل ساپار – ومىرىمىزدە وشپەستەي ەرەكشە ەستەلىك بولىپ قالادى", - دەيدى ولار.
ساياحاتشىلار ۇزاق جولداعى قيىندىقتى ەلدىڭ ىستىق ىقىلاسى مەن مەيىرىمى جەڭىلدەتكەنىن ايتادى. جول بويىندا ءار ءوڭىردىڭ تۇرعىندارى كومەك كورسەتىپ، ازىق-تۇلىك پەن دەمەۋ ۇسىنعان.
كۇتىپ الۋ ءراسىمى بارىسىندا دۇنيەجۇزى قازاقتارى قاۋىمداستىعىنىڭ وكىلدەرى جاس جۇبايلارعا ارنايى توسبەلگى مەن العىس حات تابىس ەتتى.
ءماجىلىس دەپۋتاتى ەرلان سايروۆ بۇل ساپاردى «قازاق حالقىنىڭ بىرلىگى مەن ىنتىماعىن دارىپتەگەن ەرەكشە وقيعا» دەپ باعالادى.
"قۋانبەك پەن جاينا قازاق ەلىنە دەگەن ساعىنىشىن ات ۇستىندە جەتكىزدى. بۇل ساپار ۇلتىمىزدىڭ بەرەكە-بىرلىگىن ايقىنداعان رۋحاني دۇبىرگە اينالدى", - دەدى ول.
ايتا كەتەرلىگى قۋانبەك پەن جاينانىڭ بۇل العاشقى الىس ساپارى ەمەس. 2021 جىلى ولار شىڭجاڭنان بەيجىڭگە دەيىن 4 000 شاقىرىمدى اتپەن ءجۇرىپ وتكەن.
ەسكەرتۋ جانە الدىن الۋ: استانادا جاستار اراسىنداعى ەسىرتكى قىلمىسىنا قارسى كۇرەس شارالارى تالقىلاندى
