بۇگىن جەتىسۋ وبلىسىندا فۋتبولدان قازاقستان ۇلتتىق قۇراماسىنىڭ ارداگەرلەرى جولداستىق كەزدەسۋ ءوتتى. بۇل جارىس «بۇقارالىق سپورت - بولاشاق جەڭىستەردىڭ باستاۋى» سپورتتىق ءىس-شاراسى شەڭبەرىندە ۇيىمداستىرىلدى.
تالدىقورعانداعى «جەتىسۋ» ستاديونىندا بولعان جارىستىڭ اشىلۋىندا ءسوز سويلەگەن وبلىس اكىمى بەيبىت يساباەۆ وڭىرگە ارنايى كەلگەن قوناقتارعا ريزاشىلىعىن بىلدىرە كەلە:
- بۇگىنگى كەزدەسۋ – بۇل تەك سپورت ارداگەرلەرىنىڭ دوستىق ماتچى عانا ەمەس، ءتۇرلى بۋىن وكىلدەرىن بىرىكتىرەتىن مۇمكىندىك. ويتكەنى سپورتتىڭ ءتىلى بارىنە ورتاق. قادىرلى قوناقتار، سىزدەرمەن كەزدەسكەن جاستار سالاۋاتتى ءومىر سالتىن ۇستانۋعا، سپورتپەن اينالىسۋعا، جالپى وزىنە سەنۋگە، ارمانىنا قول جەتكىزۋگە شابىت الادى دەپ سەنەمىن. بۇگىنگى جولداستىق كەزدەسۋ ءساتتى ءوتسىن! - دەدى وبلىس باسشىسى.
سول سياقتى «استانا» فك ديرەكتورى، ەل فۋتبولىنىڭ كورنەكتى وكىلى ميحايل گۋرمان، قازاق فۋتبولىندا اتى اڭىزعا اينالعان قاقپاشى، سپورت ارداگەرى قۇرالبەك ورداباەۆ، فۋتبولدان وليمپيادا چەمپيونى ەۆگەني ياروۆەنكو سويلەپ، جەتىسۋلىقتاردىڭ سپورتتاعى اياقالىسىنا جاڭا تابىستار تىلەدى.
مۇنان سوڭ ارداگەرلەر سپورتشىلار قازاقستان ۇلتتىق قۇراماسى مەن جەتىسۋ قۇراما اۋەسقوي كوماندالارى ساپىندا فۋتبول الاڭىنا شىقتى. اتاپ ايتقاندا، رەسپۋبليكالىق كوماندانىڭ قۇرامىندا جوعارىدا اتى اتالعان فۋتبولشىلارمەن قاتار ۆايت تالگاەۆ، سەرگەي ۆولگين، بەرىك ارعىمباەۆ، اسقار قوجابەرگەنوۆ جانە باسقا دا ارداگەرلەر، ال وبلىس كومانداسىندا وبلىس اكىمىنىڭ ورىنباسارى دياس ەسداۋلەتوۆ، وبلىستىق دەنە شىنىقتىرۋ جانە سپورت باسقارماسىنىڭ باسشىسى ۇلان رىسقۇل، «جەتىسۋ» فك باس جاتتىقتىرۋشىسى سامات سماقوۆ، «جەتىسۋ» فك ديرەكتورى مارك گۋرمان جانە باسقا دا ازاماتتار بولدى. جولداستىق كەزدەسۋ 2:2 ەسەبىمەن تەڭ اياقتالدى.
قوس كومانداعا دا مەدالدار تابىستالدى، ال قازاقستان ۇلتتىق قۇراماسىنا ويىننىڭ كۋبوگى بەرىلدى.
بۇگىن تالدىقورعانعا ارنايى كەلگەن قوناقتاردىڭ ءبىرى كسرو جانە قازاقستان فۋتبولىنىڭ جارقىن وكىلىنىڭ ءبىرى اسقار قوجابەرگەنوۆ ءوز پىكىرىن ءبىلدىردى:
- فۋتبولدى ناسيحاتتاعان، سپورتتى دارىپتەگەن وتە دۇرىس. مۇنداي شارالار جاستار ءۇشىن اسا قاجەت. قازىر فۋتبول الاڭدارى كوبەيىپ، جاتتىعۋعا تاماشا جاعدايلار جاسالىپ جاتىر. فۋتبولشىلارعا جاقسى مۇمكىندىكتەر تۋعىزىلادى.سونىڭ ءبارى جاستاردىڭ وسى ويىن تۇرىنە قىزىعۋشىلىعىن ارتتىرىپ كەلەدى. بۇگىن جانكۇيەرلەر ستاديوننىڭ ءبىر جاق قاناتىن تولتىرىپ وتىردى. مۇندا كەلگەن جاسوسپىرىمدەر ۇلتتىق قۇرامانىڭ ساپىندا قازاقستانعا ايگىلى فۋتبولشىلاردى، جەرگىلىكتى جانكۇيەرلەر وزدەرىنىڭ بۇرىنعى كۋميرلارىن جۇزبە-ءجۇز كوردى. مەن ءوزىمىزدىڭ «جەتىسۋ» ستاديونىنا قايتا كەلگەنىمە قۋانىشتىمىن، - دەدى ول.
