كەربۇلاق اۋدانى تۇسىنداعى كوكسۋ وزەنىنەن تەمىر ارقان ارقىلى وتپەك بولعان ەر ادامنىڭ ءمايىتى تابىلدى. قۇتقارۋشىلار 36 جاستاعى ەر ادامدى وقيعا ورنىنان 15 شاقىرىم تومەن جەردەن تاپقان، دەپ حابارلايدى “ادىرنا”.
«15 مامىردا جەتىسۋ وبلىسى اۋماعىندا جۇرگىزىلگەن ىزدەستىرۋ جۇمىستارى كەزىندە وزەن تۇبىنەن ءىز-ءتۇسسىز جوعالعان ەر ادامنىڭ ءمايىتى تابىلدى. دەنەسىندە زورلىق-زومبىلىق بەلگىلەرى جوق»، – دەپ حابارلادى وبلىستىق پوليتسيا دەپارتامەنتىنىڭ ءباسپاسوز قىزمەتى.
اتالعان فاكتى بويىنشا سوتقا دەيىنگى تەرگەۋ امالدارى جۇرگىزىلۋدە.
«پوليتسيا ازاماتتاردى سۋ ايدىندارىنىڭ ماڭىندا ساقتىق شارالارىن ساقتاپ، ەرەكشە مۇقيات بولۋعا شاقىرادى. ىزدەستىرۋ جۇمىستارىنا بەلسەندى قاتىسقانى جانە كومەكتەسكەنى ءۇشىن تجد، ۇلتتىق ۇلان قىزمەتكەرلەرىنە، جەرگىلىكتى اتقارۋشى ورگانداردىڭ وكىلدەرىنە، تۇرعىندار مەن ەرىكتىلەرگە العىس بىلدىرەمىز»، – دەپ قورىتىندىلادى وبلىستىق پد.
ىزدەۋ جۇمىستارىنا 98 ادام مەن 22 تەحنيكا جۇمىلدىرىلعان.
ەسكە سالايىق، 12 مامىر كۇنى جەتىسۋ وبلىسىندا ەر ادام وزەننەن ارقان ارقىلى وتپەك بولعاندا، قاتتى اعىس ونى اعىزىپ اكەتكەن بولاتىن.
