استانادا وتكەن قازاق كۇرەسىنەن «قازاقستان بارىسى» تۋرنيرىندە مارات بايقامۇروۆ جەڭىمپاز اتاندى، دەپ حابارلايدى “ادىرنا”.
بيىلعى سايىسقا 43 بالۋان قاتىسىپ، جارىستىڭ جۇلدە قورى 27 ميلليون تەڭگەنى قۇرادى.
فينالدىق كەزدەسۋدە مارات بايقامۇروۆ بىلتىرعى چەمپيون ەراسىل قاجىباەۆتى جەڭىپ، ءتۋرنيردىڭ جاڭا چەمپيونى اتاندى. ال قولا جۇلدە دۇنيەجۇزىلىك كوشپەندىلەر ويىندارىنىڭ چەمپيونى نۇرداۋلەت جارلىعاپوۆقا بۇيىردى.
مارات بايقامۇروۆ جارىسقا "اسكەر بارىسى" كومانداسىنىڭ اتىنان قاتىسسا، ەراسىل قاجىباەۆ – اباي وبلىسىنىڭ، نۇرداۋلەت جارلىعاپوۆ – ماڭعىستاۋ وبلىسىنىڭ نامىسىن قورعادى.
مەملەكەت باسشىسى قاسىم-جومارت توقاەۆ "قازاقستان بارىسى – 2025" ءتۋرنيرىنىڭ جەڭىمپازىن قۇتتىقتادى.
"مارات بايقامۇروۆتى قازاق كۇرەسىنەن "قازاقستان بارىسى – 2025" تۋرنيرىندەگى جارقىن جەڭىسىمەن قۇتتىقتايمىن! ول تاماشا ونەر كورسەتىپ، جانكۇيەرلەر كوڭىلىنەن شىقتى. مەملەكەت قازاق كۇرەسىنىڭ دامۋىنا الداعى ۋاقىتتا دا قولداۋ كورسەتە بەرەدى", – دەدى مەملەكەت باسشىسى ءوز قۇتتىقتاۋىندا.
ايتا كەتەيىك، "قازاقستان بارىسى" ءتۋرنيرى 2011 جىلدان باستاپ ءداستۇرلى تۇردە وتكىزىلىپ كەلەدى جانە ەلدەگى ەڭ بەدەلدى سپورتتىق جارىستاردىڭ ءبىرى سانالادى.
