ىشكى ىستەر مينيسترلىگىندە جەكە قۇرام اراسىنداعى ءتارتىپ پەن زاڭدىلىقتى قامتاماسىز ەتۋ ماسەلەسىنە ارنالعان كەڭەيتىلگەن القا وتىرىسى ءوتتى. جيىندا ەرجان سادەنوۆ ءتارتىپتى ءجيى بۇزۋعا بەيىم قىزمەتكەرلەرگە قاتاڭ شارا قابىلداۋدى تاپسىردى، دەپ حابارلايدى "ادىرنا" ۇلتتىق پورتالى.
مينيستر پوليتسيا قىزمەتىنىڭ كۇردەلى جانە جاۋاپتى ەكەنىن اتاپ ءوتىپ، قىزمەتكەرلەردىڭ باسىم بولىگى ءوز مىندەتىن ادال اتقارىپ جۇرگەنىن ايتتى. الايدا جەكەلەگەن ءتارتىپ بۇزۋشىلىقتار بۇكىل ۇجىمنىڭ بەدەلىنە نۇقسان كەلتىرەتىنىن ەسكەرتتى.
«كۇن سايىن مىڭداعان قىزمەتكەرلەرىمىز حالىقتى قورعاپ، ءوز بورىشىن ادال ورىنداپ ءجۇر. بىراق ءبىرلى-جارىم ءتارتىپ بۇزۋشىلىقتار وسى ەڭبەكتىڭ ءبارىن كولەڭكەدە قالدىرادى. بۇل بىزگە ابىروي اپەرمەيدى»، – دەدى مينيستر.
وسىعان بايلانىستى ەرجان سادەنوۆ اۋماقتىق بولىمشەلەر باسشىلارىنا جەكە قۇرام اراسىندا ءتارتىپتى كۇشەيتۋدى، ءتارتىپ بۇزۋعا بەيىم قىزمەتكەرلەرگە ەرەكشە باقىلاۋ ورناتۋدى جانە تۇزەلۋگە قابىلەتى جوق پوليتسەيلەرگە قاتىستى باتىل كادرلىق شارالار قابىلداۋدى تاپسىردى.
سونىمەن قاتار، مينيسترلىك جاس قىزمەتكەرلەرمەن جەكە پروفيلاكتيكالىق جۇمىس جۇرگىزىپ، تالىمگەرلىكتى كۇشەيتۋ جانە اشىق سوت، وفيتسەرلىك جينالىستار تاجىريبەسىن كەڭىنەن قولدانۋ قاجەتتىگىن اتاپ ءوتتى.
ايتا كەتەيىك، 13 قازاندا ەرجان سادەنوۆ قاراعاندىداعى پوليتسەي مەن ءولى ايەلگە قاتىستى وقيعانى «ۇيات جاعداي» دەپ باعالاعان بولاتىن.
