بۇگىن، 19 قاراشادا مەملەكەت باسشىسى قاسىم-جومارت توقاەۆ ىشكى ىستەر ءمينيسترى ەرجان سادەنوۆتى قابىلدادى. بۇل تۋرالى اقوردا جازدى، دەپ حابارلايدى «ادىرنا» ءتىلشىسى.
پرەزيدەنتكە ەلدەگى كريمينوگەندىك احۋال، ىشكى ىستەر ورگاندارىنا جۇكتەلگەن مىندەتتەردىڭ ورىندالۋى، سونىڭ ىشىندە «زاڭ جانە ءتارتىپ» قاعيداتىن ورنىقتىرۋ جۇمىستارى جونىندە باياندالدى.
ەرجان سادەنوۆ 10 ايدا ەلدەگى قىلمىس سانى 5,3 مىڭعا ازايعانىن جانە قىلمىستىڭ ءىزىن سۋىتپاي اشۋ دەڭگەيى جاقسارعانىن جەتكىزدى.
«وتباسىلىق-تۇرمىستىق دەڭگەيدەگى قۇقىقبۇزۋشىلىقتارمەن كۇرەس بەلسەندى تۇردە جۇرگىزىلىپ جاتىر. الدىن الۋ جۇمىستارىنىڭ ناتيجەسىندە تۇرمىستىق سيپاتتاعى قىلمىس سانى – 8 پايىز، ونىڭ ىشىندە كىسى ولىمىنە اكەلىپ سوعاتىن جاعدايلار 26 پايىز ازايدى»،- دەدى ول.
پرەزيدەنتكە بەرىلگەن مالىمەتكە سايكەس، ىزدەۋدە جۇرگەن 1 391 ادام ۇستالعان. ولاردىڭ 138-ءى شەتەلدە قولعا ءتۇستى. جەدەل ءىس-شارالار بارىسىندا 30 توننادان استام ەسىرتكىنىڭ، سونىڭ ىشىندە ءبىر توننادان استام سينتەتيكالىق زاتتاردىڭ اينالىمعا تۇسۋىنە جول بەرىلمەدى.
«ۇيىمداسقان قىلمىسقا قارسى ءىس-قيمىل اياسىندا اۋىر جانە اسا اۋىر قىلمىسقا قاتىسى بار 185 قىلمىستىق توپ ۇستالدى. ينتەرنەت-الاياقتىقپەن كۇرەس باعىتىندا 12 كولل-ورتالىق جويىلدى. ونىڭ جەتەۋى شەتەلدە ورنالاسقان. شامامەن 83 ميلليون فرود-قوڭىراۋ جانە 4 مىڭ الاياقتىقپەن اينالىسقان سايت بۇعاتتالدى. سونداي-اق الاياقتاردىڭ 2,3 ميلليارد تەڭگە قاراجاتتى ەلدەن شىعارۋىنا توسقاۋىل قويىلدى»،- دەپ ءتۇسىندىردى مينيستر.
مەملەكەت باسشىسىنا جول قاۋىپسىزدىگى مەن قۇقىقتىق ءتارتىپتى قامتاماسىز ەتۋ ماقساتىندا ەنگىزىلىپ جاتقان تسيفرلىق شەشىمدەر تانىستىرىلدى. ماسەلەن، دروندار كومەگىمەن 6 مىڭنان استام، ورتاشا جىلدامدىقتى ولشەۋ جۇيەلەرى ارقىلى 190 مىڭنان استام جول ءجۇرۋ ەرەجەسىن بۇزۋ دەرەگى انىقتالعان.
قابىلدانعان شارالار ناتيجەسىندە جول-كولىك وقيعاسى كەزىندەگى ءولىم-ءجىتىم سانى 9,4 پايىزعا، سونىڭ ىشىندە ماس كۇيىندە كولىك جۇرگىزۋشىلەر كىناسىنەن بولاتىن قايعىلى جاعدايلار 24 پايىزعا ازايعان.
سونىمەن قاتار مەملەكەت باسشىسىنا ەكسترەميزمگە قارسى كۇرەس پەن كوشى-قوندى باقىلاۋ شارالارى جونىندە باياندالدى.
كەزدەسۋ سوڭىندا قاسىم-جومارت توقاەۆ ەلدەگى قۇقىقتىق ءتارتىپ پەن قوعامدىق قاۋىپسىزدىك دەڭگەيىن ودان ءارى ارتتىرۋ بويىنشا بىرقاتار ناقتى تاپسىرما بەردى.
