ىشكى ىستەر مينيسترلىگى ءماجىلىستىڭ ەكس-سپيكەرى نۇرلان نىعماتۋليننىڭ ۇلى نۇرجان نۇرلانوۆقا قاتىستى تەرگەۋ جۇرگىزىپ جاتقانىن مالىمدەدى، دەپ حابارلايدى "ادىرنا" ۇلتتىق پورتالى.
ءىىم تاراتقان اقپاراتقا سايكەس، قىلمىستىق ءىس قر قىلمىستىق كودەكسىنىڭ 389-بابى – ء"وز بەتىنشە بيلىك ەتۋ" بويىنشا تىركەلگەن. تەرگەۋدى الماتى قالالىق پوليتسيا دەپارتامەنتىنىڭ تەرگەۋ باسقارماسى جۇرگىزۋدە.
"قازىرگى ۋاقىتتا ءىستىڭ ءمان-جايىن جان-جاقتى، تولىق جانە وبەكتيۆتى زەرتتەۋ ءۇشىن ءتيىستى تەرگەۋ ارەكەتتەرى جالعاسىپ جاتىر", - دەپ حابارلادى ءىىم ءباسپاسوز قىزمەتى.
ايتا كەتەيىك، بۇعان دەيىن ءماجىلىستىڭ ەكس-سپيكەرى نۇرلان نىعماتۋليننىڭ اعاسى ارعىن نىعماتۋلينگە ىزدەۋ جاريالانعان بولاتىن. 3 ناۋرىزدا تىركەلگەن ىزدەۋ ءىسىن سىبايلاس جەمقورلىققا قارسى ءىس-قيمىل اگەنتتىگى جۇرگىزىپ جاتىر.
باس پروكۋراتۋرانىڭ حابارلاۋىنشا، ارعىن نىعماتۋلين مەن وزگە دە تۇلعالارعا قاتىستى قاراعاندى وبلىسىندا حوككەيدى دامىتۋعا بولىنگەن بيۋدجەت قاراجاتىن جىمقىرۋ دەرەگى بويىنشا ءىس قوزعالعان.
ارعىن نىعماتۋلين 1955 جىلى قاراعاندى قالاسىندا دۇنيەگە كەلگەن. 2006 جىلدان باستاپ «سارىارقا» حوككەي كلۋبى كوممۋنالدىق مەملەكەتتىك كاسىپورنىنىڭ ديرەكتورى قىزمەتىن اتقارعان. سونىمەن قاتار، قاراعاندى وبلىستىق ءماسليحاتىنىڭ بىرنەشە شاقىرىلىمىنىڭ دەپۋتاتى بولعان. بۇعان دەيىن شىعىس قازاقستان وبلىسىنىڭ ادىلەت مينيسترلىگى تىركەۋ قىزمەتى كوميتەتىنىڭ «جىلجىمايتىن مۇلىك ورتالىعىن» باسقارعان.
