قاراعاندىدا "قاراسورا – 2025" جەدەل ءىس-شاراسى بارىسىندا ەسىرتكى تاراتقان شەتەلدىكتەر ۇستالدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
«وپەراتسيا كەزىندە 29 جانە 39 جاستاعى ەر ادامدار قالا كوشەلەرىنىڭ بىرىندە قولعا ءتۇستى. ءتىنتۋ بارىسىندا ۇلكەنىنەن ارقايسىسى شامامەن 0,5 گرامم بولاتىن قۇرامىندا A-PVP بولۋى مۇمكىن 11 تۇيىنشەك، سونداي-اق قوسىمشا 0,5 جانە 1 گرامدىق 11 تۇيىنشەك تابىلىپ، تاركىلەندى. ال ەكىنشى كۇدىكتىدەن تەلەفون تەكسەرۋ كەزىندە كۋراتورمەن جازىسقان حاتتار مەن ەسىرتكى جاسىرىلعان ورىنداردىڭ فوتوسۋرەتتەرى انىقتالدى. كورسەتىلگەن مەكەنجايلارعا تەكسەرۋ جۇرگىزۋ ناتيجەسىندە قۇرامىندا ۇقساس زات بار 16 تۇيىنشەك تابىلدى»،–دەلىنگەن حابارلامادا.
كۇدىكتىلەردىڭ تۇرعىلىقتى جەرىنەن جۇرگىزىلگەن ءتىنتۋ بارىسىندا الدىن الا مەفەدرون دەپ انىقتالعان، سالماعى 0,5 گرامم ءبىر تۇيىنشەك تاركىلەنگەن.
قازىرگى تاڭدا ۇستالعان ازاماتتارعا قاتىستى قىلمىستىق ءىس قوزعالدى. تەرگەۋ بارىسىندا ولار جاساعان ءىس-ارەكەتتەرىن مويىنداعان. كۇدىكتىلەر ۋاقىتشا ۇستاۋ يزولياتورىنا قامالدى.
