ونلاين كەزدەسۋدە قاراماعىنداعى قىزمەتكەرلەرىمەن دورەكى سويلەسكەن «قتج-جۇك تاسىمالى» جشس باس ديرەكتورىنىڭ ورىنباسارى اسان ۇمبەتوۆ جاڭا قىزمەتكە تاعايىندالدى. ەندى ول سەرىكتەستىكتىڭ باس ديرەكتورى مىندەتىن اتقارادى، دەپ حابارلايدى «ادىرنا» ءتىلشىسى.
«قازاقستان تەمىر جولى» مەن ەنشىلەس كومپانيالاردا باسقارۋ كومانداسىن ودان ءارى كۇشەيتۋ جانە قىزمەت تيىمدىلىگىن ارتتىرۋ ماقساتىندا كادرلىق تاعايىنداۋلار جۇزەگە اسىرىلدى. «قتج-جۇك تاسىمالى» جشس باس ديرەكتورى (باسقارما توراعاسى) بولىپ اسان ۇمبەتوۆ تاعايىندالدى»،—دەلىنگەن حابارلامادا.
ەسكە سالايىق، بۇعان دەيىن تەمىرجولشىلاردىڭ ونلاين جينالىسىندا ۇمبەتوۆتىڭ جۇمىسشىلارعا دورەكى سوزدەر ايتقان ۆيدەوسى جەلىگە تاراپ كەتكەن ەدى. بۇل جاعداي قوعامدا رەزونانس تۋدىردى. بىرەۋلەر ونى سىناسا، كەيبىرى قولداۋ كورسەتتى. كەيىننەن اسان ۇمبەتوۆكە ەسكەرتۋ بەرىلگەنى بەلگىلى بولدى.
