اتىراۋ وبلىسىنىڭ تەڭدىك ستانتسياسىنداعى تەمىر جول وتكەلىندە «كاماز» جۇك كولىگى مەن جۇك پويىزىنىڭ سوقتىعىسۋى سالدارىنان بىرقاتار جولاۋشىلار پويىزىنىڭ قوزعالىسى كەشىگۋى مۇمكىن. بۇل تۋرالى “قازاقستان تەمىر جولى” (قتج) ۇلتتىق كومپانياسى مالىمدەدى، دەپ حابارلايدى “ادىرنا” ۇلتتىق پورتالى.
قازىرگى ۋاقىتتا وقيعا ورنىندا قالپىنا كەلتىرۋ جۇمىستارى جۇرگىزىلىپ جاتىر. جۇمىسقا 2 قالپىنا كەلتىرۋ پويىزى مەن 6 تەحنيكا جۇمىلدىرىلعان.
ماڭعىشلاق – اتىراۋ، اقتوبە – اتىراۋ، اتىراۋ – ماڭعىستاۋ، الماتى – اتىراۋ، ۆولگوگراد – تاشكەنت باعىتىنداعى پويىزدار كەشىگەدى.
اتىراۋ وبلىسىنىڭ اكىمدىگى قاراباتان ستانتسياسىنان اتىراۋ تەمىرجول ۆوكزالىنا دەيىن جولاۋشىلاردى تاسىمالداۋ ماقساتىندا 10 اۆتوبۋس ۇيىمداستىردى.
قتج مالىمەتىنشە، اپات كەزىندە لوكوموتيۆ پەن 11 بوس ۆاگون رەلستەن شىعىپ كەتكەن، سونداي-اق لوكوموتيۆ بريگاداسىنىڭ جۇمىسشىلارى زارداپ شەككەن.
