موڭعوليادان باستالعان بالالىق ارمان بۇگىندە حالىقارالىق ارەنادا ەل نامىسىن ابىرويمەن قورعاپ جۇرگەن سپورتشىنىڭ ءومىر جولىنا اينالدى. دزيۋدو مەن دجيۋ-دجيتسۋدى قاتار مەڭگەرىپ، اقش-تاعى جارىستاردا جۇلدە العان، ءبىلىم مەن سپورتتى ۇيلەستىرە بىلگەن جاس چەمپيون – امانبەك تيلەكبەرد.
قازىرگى تاڭدا ول اقش-تا MBA باعدارلاماسى بويىنشا ماگيستراتۋرادا ءبىلىمىن جالعاستىرىپ، سپورتتاعى تاجىريبەسىن باسقارۋ مەن كوشباسشىلىق قابىلەتپەن ۇشتاستىرۋدا.
«ادىرنا» ۇلتتىق پورتالى امانبەكپەن جەڭىستەرىنىڭ سىرى جانە بولاشاقتاعى جوسپارلارى تۋرالى سۇحباتتاستىق.
- امانبەك، بۇگىندە ەل نامىسىن قورعاپ، سپورتتا جاقسى جەتىستىكتەرگە جەتىپ ءجۇرسىز. ءسىزدى ءبىرى تانىسا، ءبىرى بىلە بەرمەيدى. الدىمەن، ءوزىڭىز جايىندا ايتىپ وتسەڭىز؟
- مەن موڭعوليادا دۇنيەگە كەلدىم. 2016 جىلدان باستاپ كۇرەس سپورتىندا باعىمدى سىناپ كەلەمىن. 2018 جىلى «مونعوليانىڭ سپورت شەبەرى» اتاعىنا يە بولىپ، 2019 جىلى ۇلان-باتىر قالاسىندا وتكەن بەلبەۋ كۇرەسىنەن چەمپيون اتانىپ، سول جىلى تاريحي وتانىما، قازاقستانعا قونىس اۋداردىم.
قازاقستاندا ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە ءبىلىم الىپ، جوعارى وقۋ ورنىن ءتامامدادىم. قازىرگى تاڭدا اقش-تا ماگيستراتۋرادا MBA (ىسكەرلىك باسقارۋ) ماماندىعى بويىنشا ءبىلىمىمدى جالعاستىرىپ ءجۇرمىن.
نەگىزگى سپورت ءتۇرىم – دزيۋدو، سونىمەن قاتار دجيۋ-دجيتسۋمەن دە اينالىسامىن.
«كۇرەس – مەنىڭ ءتىلىم، ءومىر سالتىم»
- ءسىزدى دزيۋدو سپورتىنا الىپ كەلگەن باستى سەبەپ نە بولدى؟ ءبارى قالاي باستالعانىن ايتىپ بەرسەڭىز.
- بالا كۇنىمنەن ىشكى رۋحىم جەڭىسكە، تاباندىلىققا جەتەلەيتىن. اۋلادا اعالارمەن كۇرەسىپ، وينايتىنمىن. سول ءبىر قاراپايىم ويىن ۇلكەن ارمانعا اينالدى. العاش رەت كىلەمگە شىققان ساتتە ەرەكشە تولقىنىس بولدى، جۇرەگىم دۇرسىلدەپ، كوزىم تەك العا قارادى. سول ءسات مەنىڭ ءومىر جولىمدى انىقتادى. كۇرەس – مەنىڭ ءتىلىم، ءومىر سالتىم بولدى.
- 2018 جىلى موڭعوليادا “سپورت شەبەرى” اتاندىڭىز. ال قازاقستانعا كوشكەننەن كەيىن سپورتتاعى باعىتىڭىز قالاي وزگەردى؟
- ءيا، موڭعوليادا مەنىڭ سپورت جولىم ۇلتتىق كۇرەستەن باستالىپ، سول ارقىلى “سپورت شەبەرى” اتاعىن الدىم. ال قازاقستانعا كوشكەننەن كەيىن جاڭا بەلەسكە قادام باسىپ، دزيۋدو باعىتىنا اۋىستىم. بۇل وڭاي شەشىم بولعان جوق- جاڭا ەرەجەلەر، جاڭا ادىستەر، جاڭا كوزقاراس قاجەت بولدى. بىراق ءدال وسى وزگەرىس مەنىڭ سپورتتاعى كوكجيەگىمدى كەڭەيتىپ، ءوزىمدى جاڭا قىرىمنان تانىتتى.
- قاتەلەسپەسەم، ءسىز دجيۋ-دجيتسۋدان قازاقستاننىڭ ءۇش دۇركىن چەمپيونىسىز. وسى دزيۋدو مەن دجيۋ-دجيتسۋدا قاتار ونەر كورسەتۋ قيىن ەمەس پە؟ بۇل ەكى سپورت ءتۇرىن قالاي ۇيلەستىرەسىز؟
- ارينە، كەيدە قيىندىقتار بولادى. بىراق مەن ءۇشىن بۇل ەكى سپورت ءبىر-ءبىرىن تولىقتىرادى. دزيۋدو – ءتارتىپ پەن دالدىك مەكتەبى، ال دجيۋ-دجيتسۋ – ەركىندىك پەن توزىمدىلىكتىڭ ساباعى. ەكەۋىن ۇيلەستىرۋ ارقىلى مەن ءوز دەنەم مەن ويىمنىڭ تەپە-تەڭدىگىن تابامىن. بۇل مەنىڭ سپورتتاعى فيلوسوفيام دەسەم دە بولادى.
«ءبىلىم – بولاشاققا سالىنعان ەڭ مىقتى ينۆەستيتسيا»
- ءسىز سپورتپەن قاتار بىلىمگە دە باسا ءمان بەرىپ كەلەسىز. MBA باعدارلاماسىندا سپورتشى رەتىندەگى وقۋدىڭ قيىندىعى بار ما؟
- وقۋ مەن سپورتتى قاتار الىپ جۇرۋگە تىرىسامىن. 2025 جىلى اقش-تىڭ مايامي قالاسىندا وتكەن حالىقارالىق جارىستا دزيۋدودان قولا، ال دجيۋ-دجيتسۋدان كۇمىس مەدال يەلەنىپ، ەلىمىزدىڭ اتىن تاعى ءبىر مارتە الەمدىك ارەنادا تانىتتىم.
مەن ءۇشىن سپورت – تەك ناتيجە ەمەس، ەرىك-جىگەر مەن ءتارتىپتىڭ مەكتەبى. ال ءبىلىم – بولاشاققا سالىنعان ەڭ مىقتى ينۆەستيتسيا دەپ سانايمىن.
سپورت پەن وقۋ – ەكەۋى ەكى الەم سياقتى كورىنگەنىمەن، مەن ءۇشىن ەكەۋى دە ءبىر ماقساتقا جەتەلەيدى. ول – ءوزىڭدى جەڭۋ. MBA باعدارلاماسى مەنى ستراتەگيالىق ويلاۋعا، كوشباسشىلىققا جانە شەشىم قابىلداۋعا ۇيرەتتى. بۇل ءبىلىم بولاشاقتا سپورت سالاسىن باسقارۋدا، جاڭا جوبالاردى دامىتۋدا ۇلكەن كومەك بولادى دەپ سەنەمىن.
- ايتىپ وتكەنىڭىزدەي، 2025 جىلى اقش-تا وتكەن جارىستا ەكى ءتۇرلى سپورتتان جۇلدە الدىڭىز. وسى جەڭىستەر تۋرالى ايتا كەتسەڭىز.
- بۇل جەڭىستەر مەنىڭ ءومىرىمنىڭ ەرەكشە بەلەسى. ءار مەدال ارتىندا سانسىز ساعات جاتتىعۋ، شارشاۋ، جاراقات جانە قايتا تۇرۋ بار. اقش-تاعى جارىستا جەڭىسكە جەتۋ-تەك مەنىڭ ەمەس، مەنى قولداعان بارشا جانداردىڭ ورتاق جەڭىسى. سول ءسات مەنىڭ ءوز كۇشىمە، ءوز جولىما دەگەن سەنىمدى نىعايتتى.
- حالىقارالىق ارەنادا ەل نامىسىن قورعاۋ سىزگە قانداي جاۋاپكەرشىلىك جۇكتەيدى؟
- ەل اتىنان ارەناعا شىعۋ-ۇلكەن مارتەبە ءارى زور جاۋاپكەرشىلىك. سەن ارتىڭدا ميلليونداعان ادامنىڭ ءۇمىتى تۇرعانىن سەزىنەسىڭ. سوندىقتان ءار جارىس مەن ءۇشىن جاي باسەكە ەمەس،ءوز تامىرىڭا، ءوز حالقىڭا دەگەن قۇرمەتتىڭ كورىنىسى.
- بولاشاققا قانداي جوسپارلارىڭىز بار؟ قازاقستان سپورتىنا قانداي ۇلەس قوسقىڭىز كەلەدى؟
- بولاشاقتا ءوز تاجىريبەمدى جاس سپورتشىلارمەن ءبولىسىپ، سپورت ارقىلى تاربيەلەۋ – مەنىڭ باستى ارمانىم. جاستاردى رۋحاني دا، فيزيكالىق تۇرعىدا مىقتى تۇلعا ەتىپ قالىپتاستىرۋعا اتسالىسقىم كەلەدى. سەبەبى سپورت – تەك مەدال ەمەس، ول مىنەز، ول ءومىر فيلوسوفياسى.
- سۇحباتتاسقانىڭىزعا راحمەت!
