اقش-تىڭ لەيك-پلەسيد قالاسىندا ءوتىپ جاتقان ۋنيۆەرسيادادا قازاقستاندىق سپورتشى "التىن" مەدال جەڭىپ الدى، دەپ حابارلايدى “ادىرنا” ۇلتتىق پورتالى.
ەرلەر اراسىندا بياتلوننان 15 شاقىرىمعا جەكە جارىس ءوتتى. قازاقستان نامىسىن الەكساندر مۋحين، ۆاديم كۋرالەس، كيريلل باۋەر جانە بەكەنتاي تۇرلىبەك قورعادى.
ۆاديم كۋرالەس ەڭ ۇزدىك ناتيجە كورسەتىپ، قازاقستان قورجىنىنا العاشقى مەدال سالدى. وتانداسىمىز قاشىقتىقتى 42:37.4 سەكۋندتا ەڭسەردى.
كۇمىس مەدال نورۆەگيالىق ەريان موسەنگكە (+42.6) بۇيىرسا، فرانتسۋز اكسەل گارنە (+1:16.5) قولا جۇلدەگەر اتاندى.
ەسكە سالا كەتەيىك، ۋنيۆەرسيادا اقش-تىڭ لەيك-پلەسيد قالاسىندا ءوتىپ جاتىر. وعان الەمنىڭ 50 ەلىنەن ستۋدەنتتەر قاتىسۋدا.
قازاقستاننىڭ نامىسىن سپورتتىڭ ون تۇرىنەن 78 سپورتشى قورعايدى. ستۋدەنتتەر بياتلون، سنوۋبورد، شاڭعى، تاۋ شاڭعىسى، شورت-ترەك، مانەرلەپ سىرعاناۋ، شاڭعى قوسسايىسى، كونكي، شاڭعىمەن ترامپليننەن سەكىرۋ جانە شايبالى حوككەي سەكىلدى سپورت تۇرلەرىنەن باق سىنايدى.
