تۇركىستان قالاسىنىڭ اكىمى ازىمبەك پازىلبەكۇلى قالا اۋماعىندا بوي كوتەرىپ جاتقان جاڭا يپپودروم مەن قولونەرشىلەر ورتالىعىنىڭ كوممۋنالدىق-ينفراقۇرىلىم باعىتىنداعى قۇرىلىس بارىسىن تەكسەردى.
الدىمەن شاھار باسشىسى يپپودروم ماڭىنداعى جول قۇرىلىسىنىڭ بارىسىمەن تانىستى. جالپى اۋماعى 99 گەكتاردى قۇرايتىن يپپودروم كەشەنىندە ۇزىندىعى شامامەن 4 شاقىرىم بولاتىن بايگە جولى، 1500 ورىندىق اشىق تريبۋنا، 120 ورىندىق جابىق مانەج، 100 جىلقىعا ارنالعان اتقورالار جانە جاتتىعۋ الاڭدارى قاراستىرىلعان. جوبا ات سپورتىن دامىتۋعا، سونداي-اق كورەرمەندەرگە قولايلى جاعداي جاساۋعا باعىتتالعان.
قازىرگى تاڭدا قۇرىلىس جۇمىستارى جوسپارعا سايكەس جۇرگىزىلۋدە. جاڭا يپپودرومدى 2026 جىلدىڭ قاڭتار ايىندا پايدالانۋعا بەرۋ جوسپارلانىپ وتىر.
نىسان باسىندا مەردىگەر مەكەمە وكىلدەرىمەن كەزدەسكەن شاھار باسشىسى قۇرىلىس ساپاسى مەن مەرزىمنىڭ قاتاڭ ساقتالۋىن، سونداي-اق كەشەننىڭ زاماناۋي تالاپتارعا ساي ءارى كوپفۋنكتسيونالدى تۇردە سالىنۋىن قامتاماسىز ەتۋدى تاپسىردى.
سونىمەن قاتار، قىركۇيەك ايىندا پايدالانۋعا بەرىلەتىن «قولونەرشىلەر قالاشىعى» كەشەنىنىڭ قۇرىلىس الاڭىنا بارىپ، جۇرگىزىلىپ جاتقان سىرتقى ارلەۋ جۇمىستارىمەن تانىستى. جالپى اۋماعى 2,3 گەكتاردى قۇرايتىن نىساننىڭ قۇرىلىس جۇمىستارى 1,5 گەكتار اۋماقتا جۇرگىزىلۋدە. تۋريستىك جانە مادەني باعىتتاعى كەشەن 8 نەگىزگى فۋنكتسيونالدى بولىكتەن تۇرادى. مۇندا 20 شەبەرحانا، 2 شوۋرۋم، كورمە زالى، مەيرامحانا، قوناقۇي جانە وزگە دە قاجەتتى ينفراقۇرىلىم قاراستىرىلعان. سونداي-اق، وڭىرلىك ەرەكشەلىكتەردى ەسكەرە وتىرىپ، ارنايى برەندتىك كاتالوگ ازىرلەنىپ، ۇلتتىق كادەسىيلار نارىققا شىعارىلاتىن بولادى.
ازىمبەك پازىلبەكۇلى جاۋاپتى سالا ماماندارىنا قۇرىلىس ساپاسىن ارتتىرۋدى، بەلگىلەنگەن مەرزىمدى قاتاڭ ساقتاۋدى جانە كەشەننىڭ مازمۇندىق تۇرعىدان جوعارى دەڭگەيدە ۇيىمداستىرىلۋىن قامتاماسىز ەتۋدى تاپسىردى.
ۇقساس جاڭالىقتار
