ءىىم اكىمشىلىك پوليتسيا كوميتەتى توراعاسىنىڭ ورىنباسارى الەكسەي ميليۋك Telegram نەگىزىن قالاۋشى پاۆەل دۋروۆتىڭ كولساي كولىندە شومىلعانى ءۇشىن ايىپپۇل سالىنا ما دەگەن سۇراققا جاۋاپ بەردى، دەپ حابارلايدى "ادىرنا" ۇلتتىق پورتالى Ulysmedia-عا سىلتەمە جاساپ.
ميليۋكتىڭ ايتۋىنشا، دۋروۆقا قاتىستى جاعداي مەن قىزعالداق تەرگەن ايەلگە قاتىستى ءىس – ەكى ءتۇرلى قۇقىقبۇزۋشىلىق.
"بۇل ەكى بولەك قۇرام. قىزعالداققا قاتىستى ءىس – تابيعاتتى قورعاۋعا بايلانىستى قىلمىستىق جاۋاپكەرشىلىك، ال تىيىم سالىنعان ايماقتا شومىلۋ – ەرەكشە قورعالاتىن تابيعي اۋماققا كىرۋ فاكتىسى. مۇنداي جاعدايلار ءۇشىن جاۋاپكەرشىلىك ەكولوگيا مينيسترلىگىنىڭ قۇزىرەتىنە جاتادى. ءبىز ايىپپۇل راسىمدەگەن جوقپىز، تەك ماتەريالداردى جيناپ، مينيسترلىككە جولدادىق. بىلىكتىلىككە قاراي – ەسكەرتۋ بەرۋدەن باستاپ، 10 اەك-كە دەيىن ايىپپۇل سالىنۋى مۇمكىن", – دەدى ول.
پاۆەل دۋروۆ استاناعا Digital Bridge 2025 حالىقارالىق فورۋمىنا قاتىسۋ ءۇشىن كەلگەن بولاتىن. فورۋم كەزىندە ول قازاقستاننان قالىڭدىق ىزدەۋ تۋرالى قالجىڭ ايتىپ، قوعام تاراپىنان سىنعا ۇشىرادى.
بۇدان كەيىن ول الماتى وبلىسىنداعى قولساي كولىندە تىيىم سالىنعانىنا قاراماستان شومىلعان. ۇلتتىق پارك اكىمشىلىگى بۇل وقيعا بويىنشا قىزمەتتىك تەكسەرىس باستاعانىن حابارلادى.
