ەنەرگەتيكا ءمينيسترىنىڭ بۇرىنعى كەڭەسشىسى، ساراپشى ولجاس ءبايدىلدينوۆ اۆتوبۋستا ءجۇرۋ اقىسى 500 تەڭگە بولۋى كەرەك ەكەنىن ايتتى، دەپ حابارلايدى "ادىرنا" ۇلتتىق پورتالى.
«تاسىمالداۋشىلاردىڭ ايتۋىنشا، شىعىندى جاباتىن باعا — 345 تەڭگە. ولارعا ءۇشىنشى جىل قاتارىنان سۋبسيديا تولەنبەيدى. مەن بۇل تۋرالى بۇرىننان ايتىپ كەلەمىن. بۇل سالاداعى مەملەكەتتىك سۋبسيديالار اشىق ەمەس، سىبايلاس جەمقورلىققا بەيىم جانە جولاۋشىلار ءۇشىن ەشقانداي ساپا اكەلمەيدى. استانا مەن الماتىدا جولاقى 500 تەڭگە بولۋى ءتيىس ء(ماسليحات سەسسيالارىندا بۇعان دەيىن 450 تەڭگە كولەمىندەگى ءوزىن-ءوزى اقتايتىن باعا اتالعان). تەك الماتىنىڭ وزىندە بىلتىر اۆتوبۋس تاسىمالىنا سۋبسيديا رەتىندە شامامەن 200 ميلليون دوللار ءبولىندى. سىزدەر ساپانى كورىپ وتىرسىزدار ما؟ بۇل سالادا نارىقتىق باعا مەن اشىق باسەكە قاجەت»، — دەپ جازدى ءبايدىلدينوۆ ءوزىنىڭ Telegram-ارناسىندا.
ونىڭ ايتۋىنشا، «جولاۋشىلار جول قاشىقتىعىنا قاراي ءارتۇرلى اقى تولەۋى كەرەك».
ء«ۇش ايالداما جۇرگەن ادام مەن سوڭعى ايالدامادان سوڭعىسىنا دەيىن ءبىر جارىم ساعات باراتىن جولاۋشىنىڭ بىردەي اقى تولەۋىندە ەشقانداي ەكونوميكالىق نەمەسە لوگيكالىق نەگىز جوق. اۆتوبۋس پاركتەرىنە بەرىلەتىن نارىقتىق ەمەس ءارى اشىق ەمەس سۋبسيديالاردى الىپ تاستاپ، باعالاردى نارىققا جىبەرۋدى ۇسىنامىن. قالاي بولعاندا دا، ءبىز بۇعان ەرتە مە، كەش پە، كەلەمىز»، — دەدى ول.
ايتا كەتسەك، اۆتوبۋستا ءجۇرۋ اقىسى 500 تەڭگە بولۋى كەرەك دەگەن ءبايدىلدينوۆ سونىمەن قاتار «دەليدە مەترو نەمەسە LRT باعاسى 20-70 رۋپي (ياعني 140-470 تەڭگە) ارالىعىندا» ەكەنىن دە مىسالعا كەلتىرگەن.
قازىر استانادا اۆتوبۋستا ءجۇرۋ قۇنى - 110 تەڭگە. بايديلدينوۆتىڭ بۇل مالىمدەمەسى ەلدەگى باعانىڭ ءوسۋى مەن حالىقتىڭ ساتىپ الۋ قابىلەتىنىڭ تومەندەۋى اياسىندا ايتىلدى.
ەسكە سالايىق، 2022 جىلعى قاڭتارداعى قاندى وقيعالار كەزىندە ءبايدىلدينوۆ سۇيىتىلعان گاز باعاسىنىڭ وسۋىنە بايلانىستى داۋلى پىكىر ءبىلدىرىپ، حالىققا «قوعامدىق كولىككە وتىرىڭدار» دەپ كەڭەس بەرگەن ەدى. ول كەزدە «گاز باعاسىنىڭ ليترىنە 15–20 تەڭگە قوسىلۋى - ايتارلىقتاي ۇلكەن سوما ەمەس، ينتەرنەت ءۇشىن ودان دا كوپ تولەيمىز» دەگەن ءسوزى قوعامنىڭ اشۋ-ىزاسىن تۋعىزعان بولاتىن.
