الماتى تۇرعىنى اۆتوبۋستان قۇلاپ، ومىرتقاسىن سىندىرىپ الدى، دەپ حابارلايدى «ادىرنا» ءتىلشىسى.
جابىرلەنۋشىنىڭ قۇربىسىنىڭ ايتۋىنشا، وقيعا 21 جەلتوقساندا №104 باعىتتاعى اۆتوبۋستا بولعان. جۇرگىزۋشى جولاۋشىنىڭ قوعامدىق كولىكتەن تولىق شىعىپ ۇلگەرگەنىنە كوز جەتكىزبەي، ءجۇرىپ كەتكەن. سونىڭ سالدارىنان ايەل قۇلاپ، جاراقات العان. ول جۇرگىزۋشىنىڭ كەشىرىم سۇراماعانىن اتاپ ءوتتى. بۇل رەتتە پوليتسيا دا ارىز قابىلداماعانى ايتىلدى.
جابىرلەنۋشىنىڭ ءوز سوزىنشە، جەدەل جاردەم كەپتەلىسكە بايلانىستى دەر كەزىندە جەتپەگەن. ال اۆتوبۋس جۇرگىزۋشىسى ونى بەلگىسىز ءبىر جەرگە اپارىپ، ول جەردە ايەلدى اۆتوپارك قىزمەتكەرى قارسى العان. كەيىن جابىرلەنۋشىنى باسقا كولىككە اۋىستىرىپ، الماتى قالالىق №7 اۋرۋحاناسىنا جەتكىزگەن.
اتالعان جول-كولىك وقيعاسى بويىنشا الماتى قالالىق پوليتسيا دەپارتامەنتى تۇسىنىكتەمە بەردى.
«قازىرگى ۋاقىتتا ءىس بويىنشا تەكسەرۋ جۇمىستارى اتقارىلىپ، وقيعانىڭ بارلىق ءمان-جايى، ونىڭ ىشىندە قوعامدىق كولىك جۇرگىزۋشىسى مەن جولاۋشىنىڭ ارەكەتتەرى انىقتالىپ جاتىر»،-دەلىنگەن حابارلامادا.
