اقش پرەزيدەنتى دونالد ترامپ ۋكراينادان قىرىمدى رەسەيدىڭ جەرى دەپ مويىنداۋدى تالاپ ەتىپ وتىرعان جوق، بۇل تۋرالى اق ءۇي مالىمدەدى، دەپ حابارلايدى “ادىرنا” ۇلتتىق پورتالى.
"پرەزيدەنت ۋكراينادان قىرىمدى مويىنداۋدى سۇراپ جاتقان جوق. ولاردى بۇعان ەشكىم ماجبۇرلەگەن جوق. ول تەك بۇل قاتىگەز سوعىستىڭ تىم ۇزاققا سوزىلعانىن مويىنداپ، كەلىسسوز ۇستەلىنە وتىرۋدى سۇراپ وتىر. جاقسى مامىلە جاساۋ ءۇشىن ەكى تاراپ تا نارازى بولۋى كەرەك. وكىنىشكە قاراي، پرەزيدەنت زەلەنسكي بۇل بەيبىت كەلىسسوزدەردى ءباسپاسوز ارقىلى جوققا شىعارۋعا تىرىسۋدا. بۇل كەلىسسوزدەر جابىق تۇردە ءوتۋى ءتيىس", – دەدى اق ءۇيدىڭ ءباسپاسوز حاتشىسى كەرولاين لەۆيتت.
ونىڭ ايتۋىنشا، دونالد ترامپ "كوڭىلى قالعان، ءتوزىمى تاۋسىلىپ كەلەدى". لەۆيتت ەكى تاراپ تا ىمىراعا كەلۋگە دايىن بولۋى كەرەك ەكەنىن ايتىپ، "الايدا پرەزيدەنت زەلەنسكي دۇرىس باعىتتا ەمەس سياقتى" دەدى.
“زەلەنسكيگە اقش-تىڭ بەيبىت جوسپارىمەن كەلىسۋدى ترامپ ءۋلتيماتيۆتى تۇردە تالاپ ەتتى مە” دەگەن سۇراققا لەۆيتت: "كۇننىڭ سوڭىنا دەيىن ەمەس. بىراق پرەزيدەنتتىڭ كوڭىلى قالىپ وتىر جانە ول بۇل جاعدايدىڭ اياقتالعانىن قالايدى", – دەپ جاۋاپ بەردى.
بۇعان دەيىن ۆلاديمير زەلەنسكي ۋكراينا اتىستى توقتاتقاننان كەيىن رەسەيمەن "كەز كەلگەن فورماتتا" كەلىسسوزگە دايىن ەكەنىن مالىمدەگەن بولاتىن.
سونداي-اق ساياساتكەر كيەۆ قىرىمنىڭ اننەكسياسىن زاڭدى تۇردە ەشقاشان مويىندامايتىنىن ايتتى. اقش مەملەكەتتىك حاتشىسى زەلەنسكي قىرىمدى رەسەيدىڭ جەرى دەپ تانۋ ماسەلەسىن تالقىلاۋدان باس تارتقان سوڭ، لوندوندا وتەتىن ۋكراينا بويىنشا كەلىسسوزدەرگە قاتىسۋدان باس تارتتى. ناتيجەسىندە بريتان استاناسىندا ۇلىبريتانيا مەن ۋكراينا قورعانىس جانە سىرتقى ىستەر مينيسترلەرىنىڭ كەلىسسوزدەرى ءوتتى.
