Qaraǧandy oblysynda fermer öz egıstıgıne kırıp ketken bır üiır jylqyny atyp tastaǧan. Oqiǧa 28 qyrküiekte Nūra audanyna qarasty Zarechnoe auylynyŋ maŋynda boldy. Būl turaly «Vecherniaia Karaganda» Telegram-arnasynda jariialady, dep habarlaidy «Adyrna».
Aqparatqa säikes, oqiǧa ornynan oq tigen 17 bas jylqy tabylǧan, olardyŋ 14-ı sol jerde ölıp qaldy.
«Kuägerdıŋ aituynşa, jergılıktı fermer jylqylardy kölıkpen quyp jürıp, oq atqan. Keiın oqiǧa ornynan ızın suytqan. Malynan aiyrylǧan auyl tūrǧyndary küdıktı jazadan qūtylyp ketedı dep qorqyp otyr, sebebı ol – auqatty adam», — delıngen habarlamada.
Qaraǧandy oblystyq polisiia departamentı oqiǧanyŋ bolǧanyn rastady. Qūqyq qorǧau organdarynyŋ mälımetınşe, «Bötennıŋ mülkın qasaqana joiu» baby boiynşa qylmystyq ıs qozǧalǧan.
«53 jastaǧy Nūra audanynyŋ tūrǧyny küdıktı retınde anyqtalyp, polisiia bölımıne jetkızıldı. Qazır barlyq män-jai tolyq ärı obektivtı anyqtau üşın tergeu şaralary jürgızılıp jatyr», — dep habarlady vedomstvo.
Zarechnoe auylynyŋ tūrǧyndary kınälı adamdy jauapqa tartudy talap etıp otyr. Olar ıstıŋ ädıl tergeluıne kümänmen qaraidy jäne tergeudıŋ sozylyp ketuınen qauıptenıp otyr.
