قاراعاندى وبلىسىنداعى عابيدەن مۇستافين اۋىلىندا تۇندە تۇرعىن ۇيدە ءورت شىعىپ، سالدارىنان ەكى ادام قازا تاپتى. تاعى ءبىر ادام اۋرۋحاناعا جاتقىزىلدى. بۇل تۋرالى قاراعاندى وبلىسىنىڭ توتەنشە جاعدايلار دەپارتامەنتى مالىمدەدى، دەپ حابارلايدى “ادىرنا” ۇلتتىق پورتالى.
ۆەدومستۆونىڭ حابارلاۋىنشا، 6 قاراشادا تۇندە قاراعاندى وبلىسى بۇقار جىراۋ اۋدانىنداعى عابيدەن مۇستافين اۋىلىندا جالپى اۋماعى 40 شارشى مەتر بولاتىن جەكە تۇرعىن ۇيدە ءورت شىققان.
وبلىستىق تجد مالىمەتىنشە، ءورت سالدارىنان 2 ادام قازا تاپتى. كۇيىك شالىپ، ءيىس تيگەن ءۇي يەسىن توتەنشە جاعدايلار قىزمەتى ماماندارى قۇتقاردى. زارداپ شەككەن ازامات اۋىلدىق اۋرۋحاناعا جاتقىزىلعان.
«ءتىلسىز جاۋ اشىق وت كوزىنەن شىققان (سوندىرىلمەگەن تەمەكى، سىرىڭكە)»، — دەپ ءتۇسىندىردى قاراعاندى وبلىسىنىڭ توتەنشە جاعدايلار دەپارتامەنتى وكىلدەرى. بۇعان دەيىن قاراعاندىدا 2 قاباتتى جەكە مونشا عيماراتىندا توبەسى مەن توبەسىنىڭ اعاش قاپتامالارى ورتەنگەنى حابارلانعان ەدىك. قۇرباندار مەن زارداپ شەككەندەر جوق.
