قازاقستان مۇنايىنىڭ قارا تەڭىز ارقىلى تاسىمالدانۋى ۋاقىتشا توقتاتىلدى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
Reuters اگەنتتىگىنىڭ مالىمەتىنشە، رەسەي پرەزيدەنتى ۆلاديمير ءپۋتيننىڭ جاڭا جارلىعىنىڭ كۇشىنە ەنۋىنە بايلانىستى تاسىمالداۋ توقتادى.
اگەنتتىكتىڭ دەرەگىنشە، شىلدەنىڭ 24-ءى كۇنى شەتەلدىك تانكەرلەرگە رەسەيدىڭ قارا تەڭىزدەگى نەگىزگى پورتتارىنان مۇناي تيەۋگە ۋاقىتشا تىيىم سالىنعان. بۇل شەشىم، اسىرەسە، قازاقستاننان ەكسپورتتالاتىن مۇنايعا تىكەلەي اسەر ەتتى. سەبەبى قازاقستاندىق مۇنايدىڭ باسىم بولىگى كاسپي قۇبىر كونسورتسيۋمى (كتك) ارقىلى ءدال وسى باعىتپەن سىرتقى نارىققا جەتكىزىلەدى. كتك-نىڭ اكتسيونەرلەرى قاتارىندا Chevron جانە ExxonMobil سياقتى امەريكالىق ەنەرگەتيكالىق الپاۋىتتار بار.
Reuters اگەنتتىگى كەلتىرگەن ەسەپكە سايكەس، نوۆوروسسيسك پورتى ارقىلى شەتەلدىك كەمەلەردىڭ جۇك تيەۋىنە شەكتەۋ قويىلۋى الەمدىك مۇناي جەتكىزىلىمى كولەمىنىڭ 2 پايىزدان استامىن تەجەيدى.
ماسەلەن، كتك مۇنايى ەكسپورتتالاتىن رەسەيدىڭ «وڭتۇستىك وزەرەيكا» تەرمينالى ارقىلى قازاقستاندىق مۇنايدىڭ 80 پايىزدان استامى تاسىمالدانادى. ءدال وسى پورتتا دا شەتەلدىك تانكەرلەردىڭ جۇگىنە شەكتەۋ قويىلعان. جاڭا تارتىپكە سايكەس، رەسەي پورتتارىنا كىرەتىن بارلىق شەتەلدىك كەمەلەر فەدەرالدىق قاۋىپسىزدىك قىزمەتىنەن ارنايى رۇقسات الۋى ءتيىس.
جارلىق جاريالانعاننان كەيىن بىردەن كۇشىنە ەندى.
Reuters اتاپ وتكەندەي، ەۋروپالىق وداق رەسەيگە قارسى جاڭا سانكتسيالار ەنگىزگەننەن كەيىن بىرنەشە كۇن وتكەن سوڭ بۇل شەكتەۋلەر ەنگىزىلدى. بۇل شەشىم كاسپي قۇبىر كونسورتسيۋمىنىڭ جۇمىسىن قيىنداتقانى تۋرالى اقپارات تارادى.
كتك مەن رەسەي كولىك مينيسترلىگى بۇل جاعدايعا بايلانىستى ازىرگە رەسمي تۇسىنىكتەمە بەرگەن جوق. دەگەنمەن بەيرەسمي دەرەككە سايكەس، پورتتاعى جاعداي ءبىر-ەكى كۇن ىشىندە رەتتەلۋى مۇمكىن.
تامىز ايىنا كتك تەرمينالىنان ەكسپورتتالاتىن مۇناي كولەمى 1,66 ميلليون باررەل تاۋلىگىنە نەمەسە شامامەن 6,5 ميلليون توننانى قۇرايدى. بۇل كورسەتكىش شىلدە ايىنداعى جوسپارمەن سالىستىرعاندا ايتارلىقتاي وزگەرىسسىز قالعان.
ايتا كەتەيىك، بۇعان دەيىن دە كتك جۇمىسى بىرنەشە مارتە بۇزىلعان. اتاپ ايتقاندا، اقپان ايىندا ناسوس ستانتسياسىنىڭ درون شابۋىلىنان زاقىمدانۋى، ساۋىردە رەسەي تاراپىنىڭ تەرمينال وتكىزۋ قۋاتىن ۋاقىتشا شەكتەۋى تىركەلگەن بولاتىن.
