قازاقستاندا انالاردىڭ جۇكتىلىككە دايىندىعىن ارتتىرۋعا بيۋدجەتتەن 5 ملرد تەڭگەدەن استام قارجى ءبولىندى، دەپ حابارلايدى "ادىرنا" ۇلتتىق پورتالى.
بۇل تۋرالى دەنساۋلىق ساقتاۋ ءمينيسترى اقمارال ءالنازاروۆا ۇكىمەت وتىرىسىنان كەيىنگى بريفينگتە مالىمدەدى.
ءمينيستردىڭ ايتۋىنشا، انا مەن بالا ءومىرىن ساقتاۋ – ەلدىڭ دەنساۋلىق ساقتاۋ سالاسىنداعى باستى ستراتەگيالىق باعىتتاردىڭ ءبىرى.
«انا مەن ءسابي ءومىرى مەملەكەت باسشىسىنىڭ دا، ۇكىمەتتىڭ دە ۇنەمى باقىلاۋىندا. انا ءولىمى كورسەتكىشى بىلتىرمەن سالىستىرعاندا بيىل تومەندەدى. جىل سايىن 10–15 پايىز تومەندەۋ بار. بۇل ايەلدەردىڭ جۇكتىلىك كەزىندەگى كۇتىمى مەن مەديتسينالىق كومەكتىڭ ساپاسىنا بايلانىستى»، – دەدى ءالنازاروۆا.
ول سوڭعى جىلدارى تۋ كورسەتكىشىنىڭ ارتۋىنا بايلانىستى ەلىمىزدە پەريناتالدىق ورتالىقتار سالۋ جۇمىستارى بەلسەندى ءجۇرىپ جاتقانىن اتاپ ءوتتى.
«قازىر 12 پەريناتالدىق ورتالىقتىڭ جوبالىق قۇجاتتارى دايىندالۋدا. استانادا قۇرىلىس ءجۇرىپ جاتىر، جىل سوڭىنا دەيىن شىمكەنت پەن تۇركىستاندا جاڭا ورتالىقتاردىڭ قۇرىلىسى باستالادى»، – دەدى مينيستر.
سونداي-اق، كادر تاپشىلىعىن شەشۋ ماقساتىندا اكۋشەر-گينەكولوگتار مەن نەوناتولوگتارعا ارنالعان الەۋمەتتىك قولداۋ شارالارى ەنگىزىلگەن. سونىڭ ناتيجەسىندە مەديتسينالىق كادر تاپشىلىعى 19 پايىزعا، ال اۋىلدىق جەرلەردە 11 پايىزعا ازايعان.
«انالاردىڭ دەنساۋلىعىن كۇشەيتۋ ءۇشىن بيىل العاش رەت جۇكتىلىككە دايىندىققا ارنايى قاراجات ءبولىندى. ايەلدەر تەگىن زەرتتەۋلەردەن ءوتىپ، قاجەت بولسا ساۋىقتىرۋ شارالارىنان وتەدى. بۇل جۇيەلى جۇمىستاردىڭ ناتيجەسىندە كەي وڭىرلەردە تۇراقتىلىق بايقالادى»، – دەدى اقمارال ءالنازاروۆا.
مينيسترلىك قازىر اۋداندىق دەڭگەيدەگى پەرزەنتحانا بولىمشەلەرىنىڭ جۇمىسىن تالداپ، انا ءولىمىن تۇبەگەيلى ازايتۋعا باعىتتالعان كەشەندى شارالاردى قولعا العان.
ايتا كەتەيىك، مينيستر قىمبات اياق كيىممەن كوزگە تۇسكەنىن حابارلاعان ەدىك.
