جەتىسۋ وبلىسىنىڭ كەربۇلاق اۋدانىندا سوڭعى ءۇش جىلدا 34 جاڭا الەۋمەتتىك نىسان سالىنىپ قولدانىسقا بەرىلدى، سونىڭ 17-ءسى - «اۋىلداعى دەنساۋلىق ساقتاۋدى جاڭعىرتۋ» ۇلتتىق جوباسى اياسىندا، تاعى 17-ءسى جەرگىلىكتى بيۋدجەت ەسەبىنەن قولدانىسقا بەرىلگەن. بۇل تۋرالى وبلىس اكىمى بەيبىت يساباەۆتىڭ كەربۇلاق اۋدانىنىڭ اكتيۆىمەن كەزدەسۋى بارىسىندا بەلگىلى بولدى.
اتاپ ايتقاندا، جاڭا الەۋمەتتىك نىسانداردىڭ 30-ى – دەنساۋلىق ساقتاۋ، 2-ءى – سپورت ، 2-ءى – مادەنيەت سالاسىندا.
- وبلىس اۋماعىندا «اۋىلداعى دەنساۋلىق ساقتاۋدى جاڭعىرتۋ» ۇلتتىق جوباسى اياسىندا دەنساۋلىق ساقتاۋ سالاسىندا ەڭ كوپ نىسان كەربۇلاق اۋدانىندا سالىندى. سونىڭ ىشىندە دارىگەرلىك امبۋلاتوريالار باسشي، سارىباستاۋ، اقتوبە، مالايسارى، قىزىلجار، شۇبار، قاراعاش، قاراشوقى، التىنەمەل، فەلدشەرلىك-اكۋشەرلىك پۋنكتتەر جاڭالىق، قويانكوز، نۇرىم، قارىمساق، بايعازى، شاعان، مەديتسينالىق پۋنكتتەر بەرىكتاس، دولانالى اۋىلدارىندا تۇرعىزىلدى، - دەپ اتاپ ءوتتى وبلىس اكىمى بەيبىت يساباەۆ.
سول سياقتى قوعالى، جاڭالىق، بەرىكتاس، باسشي، التىنەمەل، قاسپان، قاراشوقى ەلدى مەكەندەرىندەگى مەكتەپتەر اعىمداعى جوندەۋدەن وتكىزىلگەن. تاعى ءبىر اتاپ وتەرلىگى، «الاتسەم» جشس-ءنىڭ دەمەۋشىلىگىمەن سارىوزەكتە ورتالىق ساياباق حالىق يگىلىگىنە بەرىلدى. قازىرگى كەزدە كوكساي اۋىلىندا 60 ورىندىق ورتا مەكتەپتىڭ جانە سارىوزەك اۋىلىندا كىتاپحانانىڭ قۇرىلىسى جۇرگىزىلۋدە.
- سارىوزەك اۋىلىندا تۇرىپ جاتقانىما 30 جىلدان استى. سوڭعى جىلدارى اۋدانىمىز كوركەيىپ، دامىپ كەلەدى. اۋىز سۋ ماسەلەسى شەشىلدى، تابيعي گاز كەلدى. اۋداندىق اۋرۋحانامىز جاڭادان سالىندى. ەمحانادا دەنساۋلىعىمىزدى تەكسەرۋگە قاجەتتى زاماناۋي مەديتسينالىق اپپاراتتار بار، سوندىقتان قارالۋعا باسقا وڭىرلەرگە بارۋدىڭ قاجەتى جوق. نەمەرەلەرىمىزدىڭ دەنساۋلىعىن ەمحانادا تۇراقتى باقىلاپ وتىرادى. جالپى حالىقتىڭ ءومىر سۇرۋىنە قولايلى جاعداي جاسالعانىنا قۋانىشتىمىز، - دەدى قاسيرا قۋاندىقوۆا.
