«Air Astana» اۋە كومپانياسىنىڭ باس ديرەكتورى پيتەر فوستەر 2026 جىلدىڭ ناۋرىز ايىندا قىزمەتىنەن كەتەدى. بۇل تۋرالى كومپانيانىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«پيتەر فوستەر كومپانيامەن بايلانىسىن ۇزبەي، ديرەكتورلار كەڭەسىنىڭ اعا كەڭەسشىسى رەتىندە ءوز قىزمەتىن جالعاستىرادى. كومپانيانىڭ قارجى ديرەكتورى يبراحيم دجانليەل Air Astana-نىڭ جاڭا باس ديرەكتورى بولىپ تاعايىندالادى»،– دەلىنگەن رەسمي حابارلامادا.
ديرەكتورلار كەڭەسى پيتەر فوستەردىڭ كومپانيانى باسقارۋداعى 20 جىلدىق ەڭبەگىن جوعارى باعالاپ، العىس ايتتى.
پيتەر فوستەر – ۇلىبريتانيا ازاماتى، 1960 جىلى تۋعان. ول اۆياتسيا سالاسىنداعى تاجىريبەلى مامان رەتىندە تانىمال. فوستەر ەڭبەك جولىن 1982 جىلى Cathay Pacific Airways Ltd كومپانياسىندا باستاعان، وندا گونكونگ، ازيا، اۆستراليا جانە ەۋروپادا ءتۇرلى باسقارۋشى قىزمەتتەر اتقارعان. 1999 جىلى Philippine Airlines Inc. كومپانياسىنا كەڭەسشى رەتىندە شاقىرىلعان. 2002-2005 جىلدارى Royal Brunei Airlines اۋە كومپانياسىنىڭ باس اتقارۋشى ديرەكتورى بولعان.
2005 جىلدان بەرى «Air Astana» اۋە كومپانياسىنىڭ پرەزيدەنتى جانە باس اتقارۋشى ديرەكتورى قىزمەتىن اتقارادى.
ەسكە سالايىق، بۇعان دەيىن دەپۋتات ەدىل جاڭبىرشين Air Astana اۋەكومپانياسىنىڭ جۇمىسىن سىنعا الىپ، باس اتقارۋشى ديرەكتور پيتەر فوستەرگە شۇيلىككەن ەدى.
