اقش پرەزيدەنتى دونالد ترامپ الداعى اپتالاردا قىتاي باسشىسى سي تسزينپينمەن كەزدەسپەك. بۇل تۋرالى ول اق ۇيدە كانادا پرەمەر-ءمينيسترى مارك كارنيمەن كەزدەسۋدە ايتتى، دەپ حابارلايدى «ادىرنا» ءتىلشىسى.
«مەنىڭ توراعا سيمەن قارىم-قاتىناسىم وتە جاقسى. وزدەرىڭىز بىلەسىزدەر، مەن ونىمەن بىرنەشە اپتادان كەيىن وڭتۇستىك كورەيادا كەزدەسەمىن. ءبىز بۇرىننان بەرى وتە جاقسى بايلانىستامىز»، — دەدى ترامپ.
قىتاي كوشباسشىسىمەن الداعى كەزدەسۋ تۋرالى ترامپ 1 قازاندا Truth Social پلاتفورماسىندا جازعان بولاتىن.
ء«تورت اپتادان كەيىن مەن قىتاي باسشىسىمەن كەزدەسەمىن»، — دەدى ول.
جازبادا ترامپ سي تسزينپينمەن كەلىسسوزدەر بارىسىندا اقش پەن قىتاي اراسىندا بۇرىن جاسالعان كەلىسىمگە قايتا ورالاتىنىن ايتتى. ول كەلىسىم بويىنشا قىتاي امەريكالىق اۋىل شارۋاشىلىعى ونىمدەرىن ساتىپ الۋعا مىندەتتەلگەن ەدى.
«ۇيقىشىل دجو بايدەن قىتايمەن ءبىزدىڭ كەلىسىمىمىزدىڭ ورىندالۋىن قامتاماسىز ەتە المادى. سول كەلىسىم بويىنشا ولار ميللياردتاعان دوللارلىق اۋىل شارۋاشىلىعى ونىمدەرىن، سونىڭ ىشىندە سويا بۇرشاعىن ساتىپ الۋى ءتيىس ەدى»، — دەپ جازدى ترامپ.
سونداي-اق ول بۇل ماسەلە الداعى كەلىسسوزدەردىڭ باستى تاقىرىپتارىنىڭ ءبىرى بولاتىنىن مالىمدەدى.
