وڭتۇستىك كورەيادا تۇرمىستىق تاۋارلار وندىرەتىن زاۋىتتا ءىرى ءورت شىعىپ، جۇمىس ىستەپ جۇرگەن قازاقستاندىق ازامات جوعالىپ كەتتى. بۇل تۋرالى كورەيالىق Yonhap پورتالى جاريالادى، دەپ حابارلايدى “ادىرنا”.
اتالعان جاعدايعا قازاقستان رەسپۋبليكاسى سىرتقى ىستەر مينيسترلىگىنىڭ ءباسپاسوز قىزمەتى پىكىر ءبىلدىردى.
ۆەدومستۆونىڭ مالىمەتىنشە، 30 قاڭتاردا وڭتۇستىك كورەيانىڭ ىمسون ۋەزى، مەندون-ميون ايماعىندا ازىق-تۇلىك پەن سۋسىن وندىرەتىن كاسىپورىندا ءورت شىققان. بۇعان دەيىن كورەيالىق باق وقيعانىڭ ىلعال مايلىقتار مەن جورگەك شىعاراتىن زاۋىتتا بولعانىن حابارلاعان.
ءسىم دەرەگىنە سايكەس، ورتتەن كەيىن 81 قىزمەتكەر ەۆاكۋاتسيالانعان، الايدا ەكى جۇمىسشىنىڭ، ونىڭ ىشىندە قازاقستان ازاماتىنىڭ، قايدا ەكەنى بەلگىسىز بولىپ قالعان. پوليتسيا مەن ورتكە قارسى قىزمەتتىڭ مالىمەتىنشە، 31 قاڭتار كۇنى تاڭەرتەڭ ورتەنگەن تسەح ىشىنەن جەكە باسى انىقتالماعان ءمايىت تابىلعان.
سىرتقى ىستەر مينيسترلىگىنىڭ رەسمي وكىلى ءمايىتتىڭ كىم ەكەنىن ناقتىلاۋ ءۇشىن پوليتسيا ۇلتتىق عىلىمي زەرتتەۋلەر ينستيتۋتىنا جۇگىنگەنىن حابارلادى.
«قازاقستاننىڭ كورەيا رەسپۋبليكاسىنداعى ەلشىلىگى پوليتسيامەن، ءورت ءسوندىرۋ قىزمەتىمەن جانە جوعالعان قازاقستان ازاماتىنىڭ تۋىستارىمەن تۇراقتى بايلانىستا. بۇل ماسەلە باقىلاۋدا»، – دەلىنگەن ءسىم حابارلاماسىندا.
ايتا كەتەيىك، كەيبىر باق ەۆاكۋاتسيادان كەيىن زاۋىتتىڭ ەكى شەتەلدىك قىزمەتكەرى — جاسى شامامەن 50-دەگى قازاقستان ازاماتى مەن 20-داعى نەپال ازاماتى حابار-وشارسىز كەتكەنىن جازعان. 31 قاڭتار ساعات 00:39-دا ءورت سوندىرۋشىلەر جوعالعانداردىڭ ءبىرىنىڭ دەنەسىن عيماراتتىڭ ەكىنشى قاباتىنداعى باسپالداق ماڭىنان تاپقان. قازا تاپقان ادامنىڭ جەكە باسى ازىرگە انىقتالعان جوق.
