فرانتسيا پرەمەر-ءمينيسترى سەباستەن لەكورنيۋ قىزمەتىنەن كەتتى، دەپ حابارلايدى "ادىرنا" ۇلتتىق پورتالى Le Figaro-عا سىلتەمە جاساپ.
ول بۇل لاۋازىمدا بار بولعانى 27 كۇن عانا قىزمەت اتقارعان.
بۇل ەل تاريحىنداعى ەڭ قىسقا مەرزىمدەردىڭ ءبىرى. فرانتسيا پرەزيدەنتى ەممانۋەل ماكرون ونىڭ وتستاۆكاسىن قابىلدادى.
BFM TV-ءدىڭ مالىمەتىنشە، لەكورنيۋ وتستاۆكا قارساڭىندا جاڭا ۇكىمەت قۇرامىن ۇسىنعان. مينيسترلەر كابينەتىنە نەگىزىنەن بۇرىنعى مينيسترلەر مەن ماكرونعا جاقىن تۇلعالار كىرگەن. بۇل شەشىم قوعام مەن وپپوزيتسيا تاراپىنان سىنعا ۇشىراپ، پرەمەرگە قىسىم كۇشەيگەن. وسىدان كەيىن ول ءوز ەركىمەن وتستاۆكاعا كەتۋ تۋرالى شەشىم قابىلداعان.
6 قازان كۇنى لەكورنيۋ ەليسەي سارايىندا پرەزيدەنت ماكرونمەن ءبىر ساعاتتان استام ۋاقىت سويلەسكەننەن كەيىن، ونىڭ وتستاۆكاسى رەسمي تۇردە قابىلداندى.
سەباستەن لەكورنيۋ بۇعان دەيىن قورعانىس ءمينيسترى قىزمەتىن اتقارعان جانە 9 قىركۇيەكتە پرەمەر-مينيستر بولىپ تاعايىندالعان ەدى. ونىڭ وتستاۆكاسىنان كەيىن پاريج قور بيرجاسىنداعى كورسەتكىشتەر ءبىر ساعات ىشىندە 1,73%-عا تومەندەگەن.
ەممانۋەل ماكرون پرەزيدەنتتىك قىزمەتكە كىرىسكەن سەگىز جىل ىشىندە فرانتسيادا جەتى پرەمەر-مينيستر اۋىستى. بۇعان دەيىن مۇنداي جاعداي تەك فرانسۋا ميتتەراننىڭ 14 جىلدىق بيلىگى كەزىندە تىركەلگەن
