اتادان بالاعا جەتىپ، قانشاما ۇرپاقتىڭ قۇلاق قۇرىشىن قاندىرعان ءداستۇرلى ءان-جىرىمىز بابالار تاريحىن، مۇڭى مەن ارمانىن ارقالاعان اقپاراتقا تولى ەكەنى ءسوزسىز. بىراق وكىنىشكە قاراي، بۇگىنگى ۇرپاقتىڭ بويىنا ءبىز وسىناۋ اسىل ءنارىمىزدى تولىق سىڭىرە الماي كەلەمىز. ويتكەنى حالىق اندەرى سەكىلدى باعا جەتپەس بايلىعىمىزدىڭ ناسيحاتى از. «اتامەكەن» ونەر ورداسىنىڭ ۇيىمداستىرۋىمەن وتكەن «مۇحيتتىڭ مۇراگەرلەرى» اتتى باتىس ءداستۇرلى ءان مەكتەبى وكىلدەرىنىڭ ونەر كەشى ءداستۇرلى ءاندى، سىرلى اۋەندى، سىرشىل سەزىمدى اڭساعان حالىقتىڭ كاۋسارىن قاندىردى.
ورال قالاسىنداعى «اتامەكەن» ونەر ورداسىنا جيىلعان جۇرتشىلىق الدىمەن وبلىستىق حالىق شىعارماشىلىعى ورتالىعى مەن وبلىستىق تاريحي-ولكەتانۋ مۋزەيى جاساقتاعان كورمەنى تاماشالادى. كورمەگە قويىلعان جايىق توپىراعىنان تۇلەپ ۇشقان تاريحي تۇلعالاردىڭ اسپاپتارىنىڭ كوشىرمەلەرى جانە تۇتىنعان كيىمدەرى تاڭداي قاققىزدى.
ۇلتتىق ونەرگە شولىركەگەن حالىقتىڭ كوپتىگى سونشالىق، زالدا ينە شانشار جەر تابىلمادى. كەشتىڭ تىزگىنىن ۇستاعان اقىن باۋىرجان شيرمەدينۇلى قارا ءسوزدىڭ مايىن تامىزىپ، رۋحاني كەشتىڭ شىرايىن كىرگىزدى. كونتسەرتتە اتاقتى حاتيموللا بەردىعاليەۆ، سەرىك ابدراحمانوۆ، ساعادات راحمەتجانوۆ، اسحات ورازوۆ، ساۋلە تاۋداەۆا، زياش امانعاليەۆ، كۇلاش قۋانىشقاليەۆا، قايرات كاكىموۆ، جاقسىلىق ەسلامعاليەۆ، فارحات ورازوۆ، اقمارال كەمەلحانوۆا، داستان ەسەنتەمىروۆ، ايجان مۇحامەتجانوۆا، بەيبىت قاجىعاليەۆ، ارمات الدامجاروۆ، ەرنار ءومىرالى، دانيار ەلەۋوۆ، نازگۇل قابيەۆا، نۇرالى ايتۋعانوۆ اۋەلەتىپ ءان سالعاندا، تىڭدارماندار سىلتىدەي تىندى. تالاي عاسىردىڭ سۇزگىسىنەن ءوتىپ، قايماعى بۇزىلماي بۇگىنگە جەتكەن ءداستۇرلى ءان-كۇيدىڭ تاريحى تەرەڭنەن تامىر تارتادى. ءداستۇرلى ءان ايتۋ ونەرى باسقا جانرلارمەن سالىستىرعاندا قۇرىلىمى وزگەشە ەكەنىن شىن ۇعىندىردى. كەش بويى ۇلتتىق تۋىندىلاردى تىڭداپ، قۇلاق قۇرىشىن قاندىرعان كورەرمەن قاۋىم ورىنداۋشىلاردان قوشەمەتتەرىن اياعان جوق. كورەرمەننىڭ قيقۋى ءداستۇرلى انشىلەرگە شىنايى شابىت سىيلادى.
جىر كەشىندە ءسوز العان وبلىس اكىمى ناريمان تورەعاليەۆ قازاق دالاسى جۋسانىن جەل تەربەسە دە، قۋرايىنا شىمشىق قونسا دا ءان مەن كۇي توگىلىپ قويا بەرەتىن عاجايىپ ەرەكشەلىگىمەن بەلگىلى ەكەنىن، مىڭداعان جىلدار بويى ەن دالانى تەربەپ كەلە جاتقان ۇلتتىڭ وسىناۋ ساف ونەرى ەشقاشان كومەسكى تارتپايتىنىن تىلگە تيەك ەتىپ، بولاشاقتا بۇل جوبانىڭ استانا، الماتى تورلەرىندە وتۋىنە ىقپال ەتەتىنىن جەتكىزدى.
كەش سوڭىندا «حابار» ارناسى مەن «Assyltas» قوعامدىق قورى ۇيىمداستىرعان «اسىل دومبىرا-2023» تەلەجوباسىندا باس بايگەنى جەڭىپ الىپ، ءوڭىر ابىرويىن اسقاقتاتقان بقو اقىندار كومانداسىنا «اسىل دومبىرا» سالتاناتتى تۇردە تابىستالدى. ايتىس ونەرىنىڭ جاناشىرى، قازاقستاننىڭ ەڭبەك سىڭىرگەن قايراتكەرى جۇرسىن ەرمان: – 20 وبلىستىڭ اراسىنان باتىس قازاقستان وبلىسىنىڭ اقىندارى توپ جارىپ، باس بايگەنى قانجىعالادى. وبلىس باسشىسى ناريمان مىرزادان، ونەر جاناشىرلارىنان ءسۇيىنشى سۇراي كەلدىك. ەڭسەسى بيىك، رۋحى اسقاق ەلدىڭ اقىندارى عانا توپ جارا الادى. جايىقتىڭ ۇلاندارىنىڭ مەرەيلى جەتىستىگى. جايىقتىڭ جانساياسىن كىم جاقسى كورمەيدى؟ «التىن دومبىرا» مەن «اسىل دومبىرانى» قاتار العان اقىن قازاقستاندا جوق. ايتىسقا قاتىسقان ءۇش اقىننىڭ ءبىرى جانسايا بولسا، ءبىرى قاق تورىمىزدە ونەرپازداردىڭ مەرەيىن ۇستەم ەتىپ تۇرعان باۋىرجان شيرمەدينۇلى، ەندى ءبىرى تالانتى جارقىراپ، حالىقتىڭ سۇيىسپەنشىلىگىنە بولەنىپ جۇرگەن مۇرادىم ميرلانوۆ. وسى شابىستارىڭنان تانباڭدار. بۇل سان ءتۇرلى ونەر تۇلعالارىن تۇلەتكەن ورال عوي. باقتارىڭ تايماسىن! –دەپ جەڭىمپاز اقىندارعا اق باتاسىن بەردى.
كەشتىڭ قۇرمەتتى قوناقتارى، مەملەكەتتىك سىيلىقتىڭ يەگەرى عالىم جايلىباي، «حابار اگەنتتىگى» اكتسيونەرلىك قوعامىنىڭ باسقارما توراعاسى كەمەلبەك ويشىباەۆ، «Assyltas» قوعامدىق قورىنىڭ توراعاسى، مەتسەنات دۋلات تاستەكەي «اسىل دومبىرانى» بقو اكىمى ناريمان تورەعاليەۆكە تابىستاسا، ءوڭىر باسشىسى باس جۇلدەنى يەلەنگەن جەرلەستەرىمىزدىڭ جەڭىسى – مادەنيەت سالاسىنداعى اۋقىمدى ىستەردىڭ جەمىسى ەكەندىگىن اتاپ ءوتىپ، ەلدىڭ مەرەيىن ۇستەم ەتكەن جانسايا مۋسينا، مۇرادىم ميرلانوۆ، باۋىرجان شيرمەدينۇلىنا ۇسىندى.
ايتا كەتەيىك، باتىسقازاقتاندىقتاردىڭ ابىرويىن اسقاقتاتىپ، مەرەيىن تاسىتقان «اسىل دومبىرا» «اتامەكەن» ونەر ورداسىنىڭ كىرە بەرىسىنە قويىلىپ، ونەر ورداسىنا سابىلاتىن قالا تۇرعىندارى مەن قوناقتارىنىڭ كوز قۋانىشىنا اينالاتىن بولدى.
كاۋسار بايعاليەۆا،
«ەل جانە مۇعالىم»
