باق بەتتەرىندە كاسىپكەر قايرات بورانباەۆقا شىعارىلعان ۇكىمنىڭ كۇشى جويىلعانى تۋرالى اقپارات تارادى، دەپ حابارلايدى “ادىرنا” ۇلتتىق پورتالى.
اقپاراتقا سۇيەنسەك، ءبىرىنشى سوت وتىرىسى كەزىندە ۇكىمنىڭ كۇشى جويىلدى، ءىس ءبىرىنشى ساتىداعى سوتتىڭ ەرەجەلەرى بويىنشا قايتا قاراۋعا جىبەرىلەدى. وعان دەيىن بورانباەۆ قاماۋدا قالا بەرمەك.
كاسىپكەردىڭ ادۆوكاتتارى سوتقا كىناسىن مويىنداي وتىرىپ، ءىس جۇرگىزۋ كەلىسىمىن جاساۋ تۋرالى وتىنىشپەن جۇگىنگەن. ءىستى قاراۋ ازىرگە كەيىنگە قالدىرىلدى. تاراپتارعا مامىلە شارتتارىن تالقىلاۋعا ۋاقىت بەرىلدى.
سوڭعى سوزىندە بورانباەۆ «AsiaGazChundzha» جشس مەن QazaqGaz اق اراسىنداعى مامىلەنى "كوممەرتسيالىق جانە زاڭدى، بىراق قاتە بولۋى مۇمكىن" دەپ ساناعانىن مالىمدەدى. كاسىپكەر ىقتيمال زالالدى وتەۋگە دايىن ەكەنىن ءبىلدىردى.
استانا سوتى بۇل اقپاراتتى جوققا شىعارمادى، راستاعان دا جوق.
استانانىڭ قىلمىستىق ىستەر جونىندەگى سوت القاسىنىڭ فك باسشىسى قايرات بورانباەۆقا قاتىستى ۇكىمنىڭ كۇشىن جويۋىنا «قازترانسگاز» اق رەسەيلىك گازدى ساتىپ الۋ باعاسى كورسەتىلگەن حاتتامانىڭ تۇپنۇسقاسىنىڭ بولماۋى سەبەپ بولعان. بۇل تۋرالى Orda.kz سايتى حابارلادى.
بۇعان دەيىنگى مالىمەتتەر بويىنشا، "قازترانسگاز" كومپانياسىنىڭ شەنەۋنىكتەرى «AsiaGazChundzha» جشس باقىلاناتىن دەلدال كومپانياسى ارقىلى رەسەيلىك گازدى ادەيى جوعارى باعاعا ساتىپ الىپ، كەيىن الىنعان اقشانى ۇرلاعان. تەرگەۋشىلەردىڭ ايتۋىنشا، قىلمىستىق سحەمانى «قازمۇنايگاز» ۇلتتىق كومپانياسىنىڭ بۇرىنعى باسقارۋشى ديرەكتورى يبۋللا سەرد ۇيىمداستىرعان، بىراق وعان قاتىستى ءىس جەكە وندىرىسكە بولىنگەن.
ەستەرىڭىزگە سالا كەتەيىك، اعىمداعى جىلدىڭ 31 ناۋرىزىندا استانانىڭ №2 سارىارقا سوتى «AsiaGazChundzha» جشس قۇرىلتايشىلارى قايرات بورانباەۆ پەن رومان ناحانوۆقا، سونداي-اق «Qazaq Gaz» اق باسقارما توراعاسىنىڭ بۇرىنعى ورىنباسارى تايىر جانۇزاققا قاتىستى ۇكىم شىعاردى. قايرات بورانباەۆ پەن رومان ءناحانوۆتىڭ مۇلكى تاركىلەنىپ، ۇشەۋى دە سەگىز جىلعا باس بوستاندىعىنان ايىرىلدى.
ال، جۋىردا استانانىڭ قىلمىستىق ىستەر جونىندەگى سوت القاسى سارىارقانىڭ No2 سوتىنىڭ بيىلعى 31 ناۋرىزداعى ۇكىمىنىڭ كۇشىن جويۋ تۋرالى شەشىم شىعاردى. ونىڭ شەشىمى «قازترانسگاز» اق رەسەيلىك تاراپتىڭ گازدى قانداي باعاعا ۇسىنعانى تۋرالى حاتتامانىڭ تۇپنۇسقاسىنىڭ جوقتىعىنا نەگىزدەلگەن. ونىڭ بولۋ مۇمكىندىگى جايلى فاكتى دە راستالعان جوق.
مامىلە بويىنشا، «قازترانسگاز» اق «AsiaGazChunja» جشس-نەن گازدى مىڭ تەكشە مەترى ءۇشىن 167,32 دوللاردان 176,98 دوللارعا دەيىن ساتىپ الدى. ۇكىم «گازپروم» جاۋاپكەرشىلىگى شەكتەۋلى سەرىكتەستىگى مەن «قازمۇنايگاز» اق اراسىندا 2019 جىلعى 12 شىلدەدە وتكەن كەزدەسۋدە 18-تارماقتا گازدىڭ مىڭ تەكشە مەترى ءۇشىن ساتۋ باعاسى 145 دوللار دەپ بەلگىلەنگەن حاتتاما بولعان دەگەن بولجامعا نەگىزدەلگەن. باعا ايىرماشىلىعى گاز باعاسىن شارىقتاتۋ ارقىلى ۇرلىق رەتىندە ەسەپتەلەدى، - دەلىنگەن سوت القاسىنىڭ قاۋلىسىندا.
