Forbes Kazakhstan ەلىمىزدەگى ەڭ ىقپالدى 25 ايەلدىڭ رەيتينگىن جاريالادى، دەپ حابارلايدى «ادىرنا» ءتىلشىسى.
جۋرنال تىزىمگە ەنگەن ايەلدەردىڭ ىقپالى ولاردىڭ جوبالارى جانە بيزنەسىنىڭ اۋقىمىمەن، قورلاردىڭ كاپيتالى مەن بيۋدجەتىمەن، سونداي-اق كاسىبي مامانداردىڭ سەنىمىمەن دالەلدەنەتىنىن اتاپ ءوتتى.
رەيتينگتى قالىپتاستىرۋ بارىسىندا 120 كانديدات قاراستىرىلىپ، ولاردىڭ ىشىنەن زەرتتەۋ توبى 45 ايەلدى ىرىكتەپ العان. كەيىن ساراپشىلار كەڭەسى ءوز پىكىرىن بىلدىرگەن. ونىڭ قۇرامىنا ساياساتتانۋشىلار، جۋرناليستەر، كاسىپكەرلەر جانە جۋرنالدىڭ الدىڭعى رەيتينگتەرىنە ەنگەن تۇلعالار كىرگەن.
كوشتى «حالىق بانكتىڭ» باسقارما ءتورايىمى ءۇمىت شاياحمەتوۆا باستادى. ۇشتىكتە قارجىلىق نارىقتى رەتتەۋ جانە دامىتۋ اگەنتتىگىنىڭ ءتورايىمى ءمادينا ابىلقاسىموۆا مەن مادەنيەت جانە اقپارات ءمينيسترى ايدا بالاەۆا بار.
«وتباسى بانكتىڭ» باسقارما ءتورايىمى ءلاززات يبراگيموۆا 4-ورىندا تۇر. ال 5-ورىنعا قوعام بەلسەندىسى ارۋجان ساين جايعاستى. 6-ورىندا ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا، 7-ورىندا ء«سابي» قورىنىڭ نەگىزىن قالاۋشى، كاسىپكەر اسەل تاسماعامبەتوۆا،8-ورىندا «انا ءۇيى» قورىن قۇرۋشىلاردىڭ ءبىرى انار راحيموۆا، 8- ورىندا قر پرەزيدەنتى تەلەراديو كەشەنىنىڭ پرەزيدەنتى راۋشان قاجىباەۆا تۇرسا، 10-ورىننان «قازاقستان پارلامەنتاريزمىن دامىتۋ قورى» قق پرەزيدەنتى زاۋرەش باتتالوۆا كورىندى.
باق سالاسىنىڭ جالعىز وكىلى، Orda.kz باسىلىمىنىڭ باس رەداكتورى ءارى تەڭ يەسى گۇلنارا باجكەنوۆا 11-ورىنعا جايعاستى. 12-ورىنعا پرەزيدەنت كومەكشىسى تامارا دۇيسەنوۆا، 13-ورىنعا Lancaster Group اكتسيونەرى گاۋحار قاپپاروۆا ورنالاستى.
كونستيتۋتسيالىق سوتتىڭ ءتورايىمى ەلۆيرا ءازىموۆا 14-ورىنعا شىقسا، Aubakirova School اۆتورلىق مەكتەبىنىڭ نەگىزىن قالاۋشى ءارى جەتەكشىسى ءجانيا اۋباكىروۆانىڭ ەسىمى 15-ورىندا اتالدى.
ودان بولەك، تىزىمگە استانا قارجى ورتالىعى باسشىسى ەلەنا باحمۋتوۆا، بالالار قۇقىقتارى جونىندەگى ۋاكىل دينارا زاكيەۆا، «دارا» قايىرىمدىلىق قورىنىڭ قۇرىلتايشىسى گۇلنار دوساەۆا، ۇلتتىق بانك توراعاسىنىڭ ورىنباسارى ءاليا مولدابەكوۆا، پرەزيدەنت كەڭەسشىسى كۇنسۇلۋ زاكاريا، AIX ديرەكتورلار كەڭەسىنىڭ مۇشەسى اسەل مۇقاجانوۆا، Zhanna Kan برەندىنىڭ يەسى ءارى نەگىزىن قالاۋشى جاننا كان، كولىك مينيسترلىگىنىڭ ازاماتتىق اۆياتسيا كوميتەتىنىڭ باسشىسى سالتانات تومپيەۆا، «دامۋ» قورى ديرەكتورلار كەڭەسىنىڭ مۇشەسى الينا الدامبەرگەن جانە Qaganat نەگىزىن قالاۋشى چينارا بۋعىمباەۆا كىردى.
ايتا كەتەيىك، Forbes Kazakhstan مۇنداي رەيتينگتى ەكىنشى رەت جاريالاپ وتىر. بىلتىر تىزىمدە پرەزيدەنت قاسىم-جومارت توقاەۆتىڭ قارىنداسى، كەمەل توقاەۆ قورىنىڭ قۇرۋشىلارىنىڭ ءبىرى قارلىعا ءىزباستينا بولعان ەدى.
