Аида Балаева отандық кинематографиядағы тарихи жетістікпен бөлісті. Оның айтуынша, үш аптадан бері прокатта көш бастап келе жатқан «QAITADAN» көркем фильмі 1 млрд теңгеден астам табыс жинап, мемлекеттен бөлінген қаржыны бес есеге артығымен қайтарған алғашқы жоба болды.
Фильм — жас режиссёр Думан Еркімбектің толықметражды дебюті. Ол 2023 жылғы питчингтің жеңімпазы атанған болатын. Картинада отбасы институтын дәріптеу, әлеуметтік жауапкершілік пен адамгершілік қағидаттарын насихаттау басты назарға алынған.
Аида Балаеваның айтуынша, «QAITADAN» – көрерменді терең ойға жетелейтін, ұлттық рухты көтеретін туынды. Ол барша қазақстандықтарды фильмді бірге тамашалап, отандық киноны қолдауға шақырды.
Министр сондай-ақ Мемлекет басшысының Ұлттық құрылтайда айтқан «кино ең алдымен сапалы болуы керек» деген сөзін еске алып, ұлттық киноны дамыту жұмыстары жүйелі түрде жалғасатынын атап өтті.
