29 قىركۇيەكتەگى قاسىم-جومارت توقاەۆتىڭ جارلىعىمەن عاني بەيسەمباەۆ قىزىمەتىنەن بوساتىلدى، دەپ حابارلايدى “ادىرنا” ۇلتتىق پورتالى.
بۇل تۋرالى اقوردا جازدى.
«مەملەكەت باسشىسىنىڭ جارلىعىمەن بەيسەمباەۆ عاني بەكتايۇلى قازاقستان رەسپۋبليكاسىنىڭ وقۋ-اعارتۋ ءمينيسترى لاۋازىمىنان بوساتىلدى»، – دەلىنگەن حابارلامادا.
ايتا كەتەيىك، عاني بەيسەمباەۆ بۇل قىزمەتتى 2023 جىلدىڭ قاڭتارىنان بەرى اتقارىپ كەلگەن ەدى.
ەسكە سالا كەتسەك، 2023 جىلى ءبىر توپ مۇعالىم پرەزيدەنت پەن ءماجىلىس توراعاسىنا اشىق حات جولداپ، وقۋ-اعارتۋ ءمينيسترى عاني بەيسەمباەۆتىڭ وتستاۆكاعا كەتۋىن تالاپ ەتكەن ەدى.
مەملەكەت باسشىسىنىڭ جارلىعىمەن وقۋ-اعارتۋ ءمينيسترى بولىپ جۇلدىز سۇلەيمەنوۆا تاعايىندالدى.
ول بۇعان دەيىن قر پارلامەنتى ءماجىلىسىنىڭ VII جانە VIII شاقىرىلىمدارىنىڭ دەپۋتاتى بولعان.
جاڭا مينيستر 42 جاستا، اقتوبە وبلىسىنىڭ تۋماسى.
2000-2004 جىلدارى ءال-فارابي اتىنداعى قازاق ۇلتتىق ۋنيۆەرسيتەتىندە "تاريح" ماماندىعى بويىنشا ءبىلىم العان. 2006-2008 جىلدارى وسى ۋنيۆەرسيتەتتىڭ "مادەنيەتتانۋ" ماماندىعى بويىنشا دوكتورانتۋراعا ءتۇستى. ال 2012 جىلى "مادەنيەتتانۋ" ماماندىعى بويىنشا PhD دارەجەسىن قورعاپ شىققان.
ول ەڭبەك جولىن اقتوبەدەگى الەۋمەتتىك-گۋمانيتارلىق پاندەر كافەدراسىنىڭ وقىتۋشىسى بولىپ باستاپ، كەيىن جاستار ساياساتى سالاسىندا قىزمەت ەتتى. مەكتەپتە تاريح جانە قۇقىق پانىنەن ساباق بەرگەن، جوعارى وقۋ ورىندارىندا ءتۇرلى لاۋازىمدار اتقارعان.
2012 جىلدان باستاپ “نازارباەۆ زياتكەرلىك مەكتەپتەرىندە” جاۋاپتى قىزمەتتەر اتقارىپ، 2019–2021 جىلدارى الماتىداعى فمب نزم ديرەكتورى بولدى.
2021 جىلدان باستاپ ءماجىلىس دەپۋتاتى. پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا قۇرامىندا. سونداي-اق “AMANAT” پارتياسى فراكتسياسى جەتەكشىسىنىڭ ورىنباسارى ءارى پارتيانىڭ ايەلدەر قاناتىنىڭ تەڭ توراعاسى.
