جامبىل وبلىسىندا تاڭعى ساعات بەستىڭ شاماسىندا ءىرى ءورت شىعىپ، 13 بالاسى بار وتباسى باسپاناسىز قالدى. بۇل تۋرالى كتك ارناسى جاريالادى، دەپ حابارلايدى “ادىرنا”.
كۋاگەرلەردىڭ ايتۋىنشا، الدىمەن ءۇيدىڭ سىرتىنداعى ءشوپ جانعان. ودان كەيىن جالىن شارۋاشىلىق قۇرىلىستارعا، سوڭىندا ەكىقاباتتى تۇرعىن ۇيگە تاراعان.
«وقيعا ورنىندا قاتتى گۇرسىلدەر مەن جارىلىستار ەستىلدى، وت وتە تەز جايىلدى»، – دەيدى تۇرعىندار.
ءورت كەزىندە ۇيدە بارلىق بالا بولعان. ابىروي بولعاندا، اتا-انا بارلىعىن دەر كەزىندە ەۆاكۋاتسيالاپ ۇلگەرگەن. قازىر كوپبالالى جانۇيا تۋىستارىنىڭ ۇيىنە كوشىرىلدى. ەڭ كىشى نارەستە نەبارى ءۇش اپتالىق.
وقيعاعا قاتىستى جامبىل وبلىسى توتەنشە جاعدايلار دەپارتامەنتى رەسمي مالىمدەمە جاسادى.
ء«ورت سوندىرۋشىلەر كەلگەن كەزدە اۋلادا ورنالاسقان قۇرىلىس پەن ەكىقاباتتى ءۇيدىڭ شاتىرى ورتەنىپ جاتقان. جالىننىڭ جالپى اۋماعى شامامەن 100 شارشى مەتردى قۇرادى. ءورت 6:57-دە تولىق ءسوندىرىلدى. قازا تاپقاندار مەن جاراقات العاندار جوق. قازىرگى ۋاقىتتا ءورتتىڭ شىعۋ سەبەبى انىقتالۋدا»، – دەلىنگەن حابارلامادا.
