25 قىركۇيەك ساعات 12:00-دەن 26 قىركۇيەك ساعات 12:00-گە دەيىن eGov Mobile قوسىمشاسى ارقىلى قازاقستانداعى العاشقى اتوم ەلەكتر ستانتسياسىنا اتاۋ بەرۋ بويىنشا 9 945 ۇسىنىس كەلىپ تۇسكەن، دەپ حابارلايدى “ادىرنا” ۇلتتىق پورتالى.
بۇل دەرەكتى قر اتوم ەنەرگياسى اگەنتتىگى مالىمدەدى.
كونكۋرس 25 قىركۇيەكتە باستالعان. قاتىسۋشىلار eGov Mobile قوسىمشاسىنىڭ باستى بەتىندەگى «اەس-كە ءوز اتاۋىڭىزدى ۇسىنىڭىز» باننەرى ارقىلى ۇسىنىستارىن جىبەرە الادى. سونداي-اق پايدالانۋشىلارعا كونكۋرس تۋرالى push-حابارلاما دا جىبەرىلگەن.
ينيتسياتيۆانىڭ ماقساتى – بولاشاق ستانتسيانىڭ تاريحي، مادەني جانە ۇلتتىق ماڭىزىن بەينەلەيتىن اتاۋدى تاڭداۋ. بايقاۋعا قازاقستاننىڭ ءاربىر ازاماتى قاتىسا الادى. ول ءۇشىن قوسىمشادا ءتىلدى تاڭداپ، ءوز نۇسقاسىن ەنگىزىپ، قاجەت بولسا ماعىناسىن ءتۇسىندىرىپ، ەرەجەلەرمەن تانىسقانىن راستاۋ جەتكىلىكتى.
ۇسىنىستاردى قابىلداۋ 2025 جىلعى 10 قازان ساعات 23:59-عا دەيىن جالعاسادى. تولىق ەرەجەمەن قر اتوم ەنەرگياسى اگەنتتىگىنىڭ رەسمي سايتىندا جانە الەۋمەتتىك جەلىلەرىندە تانىسۋعا بولادى.
