پرەزيدەنت قاسىم-جومارت توقاەۆتىڭ نيۋ-يورك قالاسىنداعى جۇمىس ساپارى اياسىندا ءبىر كۇندە 20-دان استام جوعارى دەڭگەيدەگى كەزدەسۋ ءوتتى.
بۇل تۋرالى مەملەكەت باسشىسىنىڭ ءباسپاسوز حاتشىسى رۋسلان جەلدىباي حابارلادى.
كەزدەسۋلەر بارىسىندا اۋىل شارۋاشىلىعى، ءبىلىم، سپورت، ينۆەستيتسيا، جاساندى ينتەللەكت سىندى ستراتەگيالىق باعىتتار قامتىلدى. ناتيجەسىندە قازاقستان ەكونوميكاسىنا 5,2 ملرد دوللار ينۆەستيتسيا تارتۋ جونىندە كەلىسىمدەر جاسالدى. قازاقستان مەن اقش-تىڭ ءىرى كومپانيالارى اراسىندا 11 مەموراندۋمعا قول قويىلدى.
پرەزيدەنت امەريكالىق جەتەكشى كورپوراتسيالار باسشىلارىمەن كەلىسسوزدەر جۇرگىزدى. اتاپ ايتقاندا:
-
PepsiCo – الماتى وبلىسىندا 368 ملن دوللارلىق سنەك زاۋىتىنىڭ قۇرىلىسى باستالدى;
-
Amazon – الماتى، اقكول، اقتاۋ قالالارىندا جەرۇستى ينفراقۇرىلىمىن جاساقتاپ، 200 ملن دوللار ينۆەستيتسيا سالماق. جوبا اياسىندا شالعاي وڭىرلەرگە جوعارى جىلدامدىقتى ينتەرنەت جەتكىزىلمەك;
-
Meta ۆيتسە-پرەزيدەنتى يانن لەكۋنمەن جاساندى ينتەللەكتىنىڭ دامۋى تالقىلاندى;
-
Chevron – قازاقستانعا تاۋەلسىزدىك جىلدارىنان بەرى 55 ملرد دوللار قۇيعانى اتاپ ءوتىلدى;
-
سونداي-اق ExxonMobil, Blackstone, Citigroup, Embraer, Cerberus Capital Management باسشىلارىمەن كەلىسسوزدەر بولدى.
قاسىم-جومارت توقاەۆ قازاقستان-اقش بيزنەسى ىنتىماقتاستىعىن نىعايتۋعا ارنالعان دوڭگەلەك ۇستەلگە قاتىستى.
سونىمەن بىرگە مەملەكەت باسشىسى اقش پرەزيدەنتى دونالد ترامپپەن كەزدەسىپ، ەكونوميكالىق ىقپالداستىقتى كەڭەيتۋ ماسەلەلەرىن تالقىلادى. ترامپ Truth Social پاراقشاسىندا جالپى قۇنى 4 ملرد دوللار بولاتىن 300 لوكوموتيۆ ءوندىرىسى تۋرالى كەلىسىمدى ەرەكشە اتاپ ءوتتى.
بۇدان بولەك، توقاەۆ بۇۇ باس حاتشىسى انتونيۋ گۋتەرريشپەن، ۋكراينا پرەزيدەنتى ۆلاديمير زەلەنسكيمەن، چەرنوگوريا پرەزيدەنتى ياكوۆ ميلاتوۆيچپەن، سونداي-اق اقش ساۋدا ءمينيسترى، ساۋدا پالاتاسى جانە ارنايى وكىلدەرىمەن كەلىسسوزدەر جۇرگىزدى.
ساپار اياسىندا پرەزيدەنت فيفا باسشىسى دجانني ينفانتينونى قابىلداپ، قازاقستاندىق فۋتبولدى دامىتۋعا باعىتتالعان بىرلەسكەن جوبالاردى تالقىلادى.
