ەلوردادا ەكولوگيالىق مادەنيەتتى قالىپتاستىرۋعا باعىتتالعان “جاسىل ەل — بولاشاق ءۇشىن” اتتى اۋقىمدى شارا ءوتتى. شارانى استانا قالاسى سارايشىق اۋدانى اكىمدىگى ۇيىمداستىردى.
مەرەكەلىك ءىس-شاراعا قالا تۇرعىندارى، بالالار مەن اتا-انالار قاتىسىپ، تابيعاتتى قورعاۋ جانە ەكولوگيالىق ساۋاتتىلىق جونىندە پايدالى اقپارات الدى. ۇيىمداستىرۋشىلاردىڭ ايتۋىنشا، بۇل باستاما قوعامدى جاسىل ءومىر سالتىنا باۋلۋدى، جاستاردىڭ تابيعاتقا دەگەن سۇيىسپەنشىلىگىن ارتتىرۋدى جانە ەكولوگيالىق جاۋاپكەرشىلىكتى كۇشەيتۋدى ماقسات تۇتادى.
باعدارلاما بارىسىندا قاتىسۋشىلارعا ارناپ ءتۇرلى ويىن-ساۋىق قويىلىمدارى، قىزىقتى شەبەرلىك ساباقتارى، تانىمدىق ۆيكتورينالار ۇيىمداستىرىلدى. بالالار ءتۇرلى جارىستارعا قاتىسىپ، ويىن ويناپ، ۆيكتورينادا ءبىلىمىن شىڭدادى. 
شارا اياسىندا تابيعاتتى قورعاۋ بويىنشا ەرىكتىلەر قوزعالىسىنىڭ ماڭىزى ەرەكشە اتالىپ ءوتىلدى. سونداي-اق، جاس بۋىن وكىلدەرىنە قورشاعان ورتانى ايالاۋدىڭ قاراپايىم ءارى ءتيىمدى جولدارى ءتۇسىندىرىلدى.
كەلۋشىلەردىڭ پىكىرىنشە، شارا ەلوردالىقتاردىڭ ءبىر جاعىنان كوڭىل كوتەرۋىنە، ەكىنشى جاعىنان ەكولوگيالىق ءبىلىمىن ارتتىرۋعا مۇمكىندىك بەردى. ءىس-شارادا بەلسەندىلىك تانىتىپ، سايىستارعا قاتىسقاندار ارنايى سىيلىقتاردى جەڭىپ، ەكولوگيالىق تاقىرىپتا سۋرەتتەردى بويادى.
“جاسىل ەل — بولاشاق ءۇشىن” اكتسياسى استانالىقتاردىڭ كوڭىلىنەن شىعىپ، تابيعاتتى قورعاۋعا دەگەن قوعام نازارىن ارتتىرا ءتۇستى.
