19-20 قىركۇيەك قالا كۇنىنە وراي الماتىدا پانفيلوۆ جانە جىبەك جولى جاياۋ جۇرگىنشىلەر كوشەلەرى بويىندا قالا تۇرعىندارى مەن قوناقتارىنا ارنالعان اۋقىمدى Alma Qala Fest فەستيۆالى وتەدى.
مادەني ءىس-شارا باعدارلاماسى الماتىنىڭ تاريحى مەن زاماناۋي كەلبەتىن تانىستىرۋعا، ۇلتتىق مادەنيەت پەن ءداستۇردى دارىپتەۋگە، شىعارماشىلىق يندۋستريانى قولداۋعا جانە قالا تۇرعىندارىنا ءتۇرلى فورماتتاعى دەمالىس ۇسىنۋعا باعىتتالعان.
فەستيۆال اۋماعىندا بىرنەشە تاقىرىپتىق ايماقتار جۇمىس ىستەپ، كەلۋشىلەرگە مادەنيەت، ونەر، سپورت، ەكولوگيا، تسيفرلىق تەحنولوگيالار، گاسترونوميا جانە بالالارعا ارنالعان ويىن-ساۋىق باعىتتارىنداعى ءتۇرلى باعدارلامالارعا قاتىسۋعا مۇمكىندىك بەرەدى.
فەستيۆالدىڭ نەگىزگى بولىكتەرىنىڭ ءبىرى – الما شارۋاشىلىقتارىنىڭ جارمەڭكەسى. جارمەڭكەگە الماتى وڭىرىندەگى 50 الما شارۋاشىلىعى قاتىسىپ، 200 توننادان استام المانىڭ ءتۇرلى سورتتارى مەن تۇرلەرىن ۇسىنادى. پانفيلوۆ قازىبەك بي كوشەلەرى الاڭىندا كەلۋشىلەر وتاندىق وندىرۋشىلەردىڭ ونىمدەرىمەن تانىسىپ، المانىڭ الۋان تۇرىنەن ءدام تاتا الادى.
«الماتى» كورمە ايماعىندا قالانىڭ تاريحىن، ساۋلەتىن، تابيعاتىن جانە وزىندىك كەلبەتىن بەينەلەيتىن كارتينالار كورمەسى ۇيىمداستىرىلادى. ال ەلشىلىكتەر اللەياسىندا قاتىسۋشى مەملەكەتتەردىڭ مادەنيەتى مەن داستۇرلەرى تانىستىرىلادى. كورمە بارىسىندا ۇلتتىق ونەر، قولونەر بۇيىمدارى، ءداستۇرلى مادەني قۇندىلىقتار مەن ءتۇرلى ەلدەردىڭ ەرەكشەلىكتەرى ۇسىنىلادى.
فەستيۆالدىڭ زاماناۋي ايماقتارىنىڭ ءبىرى – Digital Zone. مۇندا تسيفرلىق تەحنولوگيالار مەن ينتەراكتيۆتى جوبالار ۇسىنىلىپ، الماتى تاريحىنا ارنالعان AI-اقپاراتتىق-تانىمدىق ينستاللياتسيالار جۇمىس ىستەيدى. سونىمەن قاتار كەلۋشىلەر ارقان تارتىس، ساداق اتۋ جانە باسقا دا ينتەراكتيۆتى ويىندارعا قاتىسا الادى.
Eco Zone ايماعى ەكولوگيالىق باستامالار مەن جوبالاردى تانىستىرۋعا ارنالسا، Ethno Zone ۇلتتىق مادەنيەت، ءداستۇر جانە قولونەردى ناسيحاتتايدى. ەتنوايماقتا قولونەرشىلەر جارمەڭكەسى ءوتىپ، كەلۋشىلەر ءۇشىن ءتۇرلى شەبەرلىك ساباقتارى ۇيىمداستىرىلادى.
بەلسەندى دەمالىستى ۇناتاتىندار ءۇشىن Sport Zone جۇمىس ىستەيدى. مۇندا سپورتتىق ويىندار، ەستافەتالار جانە ۇلتتىق ويىندار وتكىزىلەدى. بالالارعا ارنالعان ارنايى ايماقتا كىشكەنتاي قوناقتار ءۇشىن ويىندار، انيماتورلار، باتۋتتار، اكۆاگريم، سابىن كوپىرشىكتەرى، ازوتتىق شوۋ جانە باسقا دا ويىن-ساۋىق باعدارلامالارى ۇيىمداستىرىلادى. فەستيۆال قوناقتارىنا قالانىڭ گاسترونوميالىق الەۋەتىن تانىستىراتىن 25 قالالىق مەيرامحانانىڭ ارنايى ايماعى دا ۇسىنىلادى.
كينوسۇيەر قاۋىم ءۇشىن جەكە كينو ايماعى جۇمىس ىستەيدى. باعدارلاما اياسىندا «جاس ەمەس جۇبايلار»، ء«مادي in China»، «سىنىپتاس»، «قولىمنان ۇستا»، «زامان Back»، «مافيا» جانە قازاق كينوسىنىڭ التىن قورىنا ەنگەن فيلمدەر كورسەتىلەدى. سونىمەن قاتار كورەرمەندەر «زامان Back» جانە «فاميليا» فيلمدەرىنىڭ اكتەرلەرىمەن ارنايى كەزدەسۋگە قاتىسا الادى.
فەستيۆالدىڭ مۋزىكالىق جانە شىعارماشىلىق باعدارلاماسى بىرنەشە ساحنادا وتەدى. باس ساحنادا (استانا الاڭى) فەا «وتىرار سازى»، مۋزارتLIFE, رايىم ۋايىس، «ادەمى اي» دۋەتى، قۇدايبەرگەن بەكىش جانە ەركەبۇلان قۇماروۆ ونەر كورسەتەدى. كىشى ساحنا №1-دە (ت. جۇرگەنوۆ اتىنداعى قازاق ۇلتتىق ونەر اكادەمياسى جانىنداعى ساحنا ) ءالي وقاپوۆ، مادي رىمباەۆ، اقەركە اماليات، نۇرمۇحاممەد جاقىپ، «حازار» توبى، دارو جانە ۆەنەرا الپىسباەۆا ونەر كورسەتەدى. ال كىشى ساحنا №2-دە (جىبەك جولى كوشەسى) Live band Rockn rolla, يممەرسيۆتى قۋىرشاق تەاترى، «استرا» توبى، نۋرداۋلەت كارلوۆ، الەم كۋساينوۆا جانە ازامات تورەحان ونەر كورسەتەدى.
اتاۋلى مەرەكەلىك ءىس-شارالاردىڭ وتۋىنە بايلانىستى تولە بي جانە قازىبەك بي كوشەلەرىنىڭ ابىلاي حان داڭعىلى مەن نازارباەۆ داڭعىلى ارالىعىنداعى ۋچاسكەلەرى 17 قىركۇيەك ساعات 15:00-دەن باستاپ 21 قىركۇيەك ساعات 03:00-گە دەيىن ۋاقىتشا جابىلادى.
