قازاقستاندىق ءانشى امىرە حالىقارالىق “ينتەرۆيدەنيە – 2025” بايقاۋىندا “دالا تاڭى” كومپوزيتسياسىن ورىندايدى، دەپ حابارلايدى "ادىرنا".
بۇل ءان ۇسىنىلعان 10 نۇسقانىڭ ىشىنەن تاڭدالعان. مۋزىكاسىن ورىنداۋشىنىڭ ءوزى جازسا، ءسوزىن اقىن سايات راحىمجانوۆ قالامعا العان.
بايقاۋداعى امىرەنىڭ ءنومىرى ەرەكشە بولماق. ونەر يەسىمەن بىرگە ساحناعا سەگىز جاسار جاسمين قايراتقىزى شىعادى. ول – قازاقستاندىق دەلەگاتسيانىڭ ەڭ جاس مۇشەسى. ارنايى كاستينگكە قاتىسقان 100 ۇمىتكەردىڭ ىشىنەن جاسمين ۇزدىك تانىلدى. قويىلىمنىڭ تولىق مازمۇنى ازىرگە قۇپيا ساقتالۋدا، الايدا وزگە ەلدەردىڭ قاتىسۋشىلارى نومىرگە جوعارى باعا بەرگەن.
"بۇل ءان تەك وسىندا عانا ەمەس، قاتىسۋشىلاردىڭ بارلىعىنىڭ جۇرەگىن جاۋلاپ الدى. ولار اۋەنىن بىرگە ايتىپ، سۇيسىنە قابىلداپ جاتىر. ءبىزدىڭ باستى ماقساتىمىز – بۇل تۋىندى قازاقستاندا دا حيتكە اينالۋى. ول وتانعا دەگەن ماحابباتتى پاش ەتەتىن پاتريوتتىق اندەردىڭ كوشباسشىلارىنىڭ ءبىرى بولسىن دەيمىز", - دەدى قازاقستان دەلەگاتسياسىنىڭ باس پروديۋسەرى التىنبەك راحمەتوۆ.
بايقاۋعا 23 ەلدىڭ ورىنداۋشىسى قاتىسىپ جاتىر. فينالدى 20 قىركۇيەك كۇنى ساعات 22:30-دا “ەۋرازيا ءبىرىنشى ارناسى” تىكەلەي ەفيردە كورسەتەدى.
