ءۇي جوندەۋ جۇمىستارى كەزىندە ءان ايتىپ جەلىدە جۇلدىز بولعان ءانشى گۇلمايدان سەرىكباي (لاقاپاتى - دانا) ءوزى تۋرالى تولىعىراق باياندادى، دەپ حابارلايدى "ادىرنا" ۇلتتىق پورتالى Tengrinews.kz سايتىنا سىلتەمە جاساپ.
گۇلمايدان 1994 جىلى قىزىلوردا وبلىسى، شيەلى اۋدانى، بەستام اۋىلىندا دۇنيەگە كەلگەن. ءانشى قورقىت اتا ۋنيۆەرسيتەتىندە "جوعارى مۋزىكالىق ءبىلىم" ماماندىعىندا وقىعان.
"وتباسىلىق جاعدايىما بايلانىستى وقۋ ورنىنان 3-كۋرستان كەيىن كەتىپ قالدىم. قازىر وتباسىلىمىن. ءتورت جاسار ۇلىم بار", - دەيدى ول.
گۇلمايدان نەگىزى انشىلىك ونەردە جۇرگەن ەكەن، كوبىنە كافە، مەيرامحانالاردا ءان سالعان. الايدا كوروناۆيرۋس پاندەمياسى باستالىپ، ءبارى كارانتينگە جابىلعاننان كەيىن ءۇي جوندەۋ جۇمىسىنا كىرىسىپ، ناپاقا تابۋعا كوشكەن.
سونداي-اق، ءانشى جەلىدە كوپ تارالعان ۆيدەو قاشان جانە قانداي جاعدايدا تۇسىرىلگەنىن ايتىپ بەردى.
"سودان بەرى كورشى كەلىنشەك ءارى جاقىن قۇربىما اينالعان جۇلدىزبەن بىرگە جۇمىس ىستەپ ءجۇردىم. بىرگە سترويكاعا شىققانبىز، بوس ۇيدە اكۋستيكاسى جاقسى بولعاننان كەيىن داۋىس جاقسى شىقتى. سول قۇربىم ماعان بايقاتپاي، ۆيدەوعا ءتۇسىرىپ الىپتى. ۆيدەو وتكەن اپتادا جۇمادا تۇسىرىلگەن، مەن بىلمەي، ءانىمدى ايتىپ وتىرعان ەكەنمىن. بولمەدە اكۋستيكا جاقسى بولعان سوڭ ەلگە جاقسى تارالدى دەپ ويلايمىن", - دەيدى دانا لاقاپاتىمەن ونەرگە كەلگەن گۇلمايدان سەرىكباي.
كومەكشىسى گاۋھار راماتۋللانىڭ ايتۋىنشا، گۇلمايدان باستاپقىدا TikTok الەۋمەتتىك جەلىسىندە تانىلىپ، كەيىن ءتۇرلى مەسسەندجەرلەر ارقىلى ۆيدەوسى تارالعان.
"TikTok-تا ۆيدەو تارالدى، اپكەمە وسى قىزدى وتباسىمىزبەن كورىپ جاتىرمىز دەپ، تاۋىپ الىپ، ءوزىم جەلىدە بەلسەندىلىك جاساۋ جولىن بىلگەندىكتەن، ينستا-پاراقشاسىن اشتىم، پابليكتەر ءبىرىنشى تاراتا باستادى. سول پابليكتەردە شىققان سوڭ حالىق بىردەن ماقتاپ، ونەرىن باعالادى. سول پىكىرلەرگە دانا جاۋاپ جازىپ، راقمەتىن ايتىپ ءجۇردى. وسىلايشا كەشكە قاراي بلوگەر داۋلەت مۇقاەۆتىڭ كومەكشىسى حابارلاسىپ، ءوز پاراقشاسىنا جۇكتەدى. سوسىن بارلىعى حابارلاسا باستادى", - دەيدى ءانشىنىڭ كومەكشىسى.
دانا دۇنيەگە كەلگەندە پەرزەنتحانادان شىعارعاندا "قازاقستان ايەلدەرى" جۋرنالىندا گۇلمايدان سۇندەتوۆا دەگەن ءانشىنىڭ سۋرەتى تۇرعان ەكەن. سوندىقتان اتا-اناسى وعان ءانشى بولسىن دەگەن تىلەكپەن وسىنداي ەسىم تاڭداپتى.
ء"انشى بولسىن دەپ، اتىمدى قويعاندا پەرىشتەلەر ءاۋمين دەگەن شىعار. تاعى ءبىر جاعىنان ناعاشى اجەم ىرىسقال وكسىكباەۆا داۋسى جاقسى بولعان. ول كىسىنى ءوزىم كورمەدىم. بىراق ۇلكەندەر ايتىپ وتىرادى. سول كىسىنىڭ ونەرى دارىعان شىعار", - دەيدى ءانشى.
ايتا كەتەيىك، قازىرگى ۋاقىتتا ءانشىنىڭ پاراقشاسىنا 20 مىڭعا جۋىق ادام جازىلىپ ۇلگەرگەن. دانانىڭ ۆيدەوسىن ءانشى ساكەن مايعازيەۆ تە جاريالاعان.
"جەلىنى "جارىپ جاتقان" ارۋدى مەن دە جاريالاپ قويايىن. "قازاقستان داۋىسى" جوباسىنا كەلگەندە تەتىكتى تورتەۋمىز دە باسار ما ەدىك. ء"اۋ" دەمەيتىن قازاق جوق" دەگەن ءسوزدىڭ دالەلى وسى ەمەس پە. تانىس بولىڭىزدار، دانا سەرىكباي 1994 جىلى قىزىلوردا وبلىسىندا دۇنيەگە كەلگەن. دانانىڭ مۋزىكالىق ءبىلىمى جوق. تەك 3 كۋرس وقىپ، وقۋى اياقتالماي قالعان. ياعني، قولىندا ديپلوم دا جوق. بىراق اللا بەرگەن داۋىس بار. قازىرگى ۋاقىتتا الماتىداعى پاتەرلەردە جوندەۋ جۇمىستارىن (ەۆرورەمونت) جاساپ، ناپاقاسىن تاۋىپ ءجۇر ەكەن. جولىڭ اشىق بولسىن، دانا كىز!", - دەپ قولداۋ ءبىلدىرىپتى مايعازيەۆ.
جاس ونەرپازدى ءبىرىنشى بولىپ قولداعاندار اراسىندا بلوگەر داۋلەت مۇقاەۆ بار.
"مىنانداي داۋىسپەن دانانىڭ ءان ايتاتىن جەرى ادام جوق تار بولمە ەمەس، مىڭداعان كورەرمەنى بار ۇلكەن ساحنالار دەپ ويلايمىن. تالانتى بار، تانىسى جوق جانعا مىقتى پروديۋسەر تابىلسا ەكەن دەيمىن. ساتتىلىك، دانا!", - دەيدى بلوگەر داۋلەت مۇقاەۆ (Dauletten).
"ادىرنا" ۇلتتىق پورتالى
