ۇلت ۇستازى احمەت بايتۇرسىنۇلىنىڭ بۇرىن كوپشىلىك كورمەگەن سۋرەتىن تابىلدى. بۇل تۋرالى ادەبيەتشى، الاشتانۋشى قايىربەك كەمەڭگەر «ەگەمەن قازاقستان» گازەتىنە جاريالاعان ماقالاسىندا ايتتى، دەپ حابارلايدى «ادىرنا» ءتىلشىسى.
9–13 قىركۇيەك ارالىعىندا قازاقستان جازۋشىلار وداعى مەن مادەنيەت جانە اقپارات مينيسترلىگىنىڭ «تمد ەلدەرىنىڭ ارحيۆتەرىندەگى قازاقستاندىق جازۋشىلاردىڭ زەرتتەۋ جۇمىستارى» جوباسى اياسىندا قازان قالاسىندا عىلىمي-زەرتتەۋ ءىسساپارى وتكەن.
ءىسساپار بارىسىندا قازان قالاسىنداعى «تاتار ادەبيەتى تاريحىنىڭ مۋزەيى – شاريف كامال مەموريالدىق پاتەرىنەن» احمەت بايتۇرسىنۇلى بەينەلەنگەن بەلگىسىز سۋرەت انىقتالعان. سۋرەت «اراب جازۋىن رەفورمالاۋ كونكۋرسىنا قاتىسۋشىلار. قازان، 1927» دەگەن تۇسىندىرمەمەن ساقتالعان. فوتودا مۇحاممەد ءيدريسوۆتىڭ ەسىمى عانا كورسەتىلگەنىمەن، بەينەلەنگەن تۇلعالاردىڭ ورتاسىندا احمەت بايتۇرسىنۇلىنىڭ بەينەسى ايقىن كورىنگەن. مۋزەي ماماندارى العاشىندا سۋرەتتى تۇسىرۋگە رۇقسات بەرمەي، كەيىن كەلىسىمگە كەلگەن.
قايىربەك كەمەڭگەردىڭ ايتۋىنشا، احمەت بايتۇرسىنۇلىنىڭ قازان قالاسىندا بۇرىن-سوڭدى بولعانى تۋرالى بۇعان دەيىن اقپارات ايتىلماعان.
«احمەت بايتۇرسىنۇلى قازان قالاسىنا كەلدى دەگەن اقپاراتتى بۇرىن ەستىمەدىك... «كەلگەنى ءسوزسىز، مۇنى وسى سۋرەت راستايدى» دەپ وي تۇيدىك. ءبىر ەسەپتەن، مۇراعات ماتەريالىنا مۇقيات تاتار اعايىن سۋرەتتىڭ قايدا جانە قاشان تۇسىرىلگەنى جايىندا ولقىلىق جىبەرە قويماس دەپ تە ويلادىق»،–دەيدى ول.
ادەبيەتتانۋشى ۇلت ۇستازىنىڭ 1927 جىلدىڭ كۇزىندە تاتار زيالىلارىمەن بىرلەسىپ، اراب ءالفاۆيتىن رەفورمالاۋ جونىندەگى كوميسسيانىڭ مۇشەسى بولعانىن مالىمدەدى. احمەت بايتۇرسىنۇلىنىڭ جۇمىسى جەرگىلىكتى «ماعريفات» جۋرنالىنىڭ 1927 جىلعى 12-ءنشى سانىندا جاريالانعان.
ء«بىزدىڭ انىقتاۋىمىز بويىنشا، سۋرەتتەگى 22 ادام اراسىندا احمەت بايتۇرسىنۇلى جالعىز قازاق. تاتار عالىمى، وڭ جاق شەتتە وتىرعان مۇحاممەد يدريسوۆ پەن احمەت بايتۇرسىنۇلى الدىندا عانا قاعاز بار. بۇل جايت تا ەكى عالىمنىڭ قالعاندارىنان ءباسى بيىك ەكەنىن بىلدىرەتىندەي. ورتاداعى شاعىن ستولعا ەكى ادام عانا سيادى. ەكى ادامنىڭ ءبىرى – احمەت بايتۇرسىنۇلى. اقاڭا ۇستەل باسىنان، قۇرمەتتى جەردەن ورىن بەرىلگەن. قازاق عالىمى اياعىن دا، قولىن دا ايقاستىرىپ جيناقى وتىر. جاس مولشەرى جاعىنان اقاڭ بارلىعىنان ۇلكەن سەكىلدى. سۋرەت 1927 جىلدىڭ كۇز مەزگىلىندە تۇسىرىلگەن دەگەن مالىمەتتى انىقتادىق. ن.ميفتاحۋتدينوۆا 1927 جىلدىڭ قازان، قاراشا ايلارى بولۋ كەرەك دەپ پايىمدادى. اقاڭنىڭ جاسى بۇل كەزدە 55 جاستان اسقان»،—دەپ تولىقتىردى زەرتتەۋشى.
