Ūlt ūstazy Ahmet Baitūrsynūlynyŋ būryn köpşılık körmegen suretın tabyldy. Būl turaly ädebietşı, alaştanuşy Qaiyrbek Kemeŋger «Egemen Qazaqstan» gazetıne jariialaǧan maqalasynda aitty, dep habarlaidy «Adyrna» tılşısı.
9–13 qyrküiek aralyǧynda Qazaqstan Jazuşylar odaǧy men Mädeniet jäne aqparat ministrlıgınıŋ «TMD elderınıŋ arhivterındegı qazaqstandyq jazuşylardyŋ zertteu jūmystary» jobasy aiasynda Qazan qalasynda ǧylymi-zertteu ıssapary ötken.
Issapar barysynda Qazan qalasyndaǧy «Tatar ädebietı tarihynyŋ muzeiı – Şarif Kamal memorialdyq päterınen» Ahmet Baitūrsynūly beinelengen belgısız suret anyqtalǧan. Suret «Arab jazuyn reformalau konkursyna qatysuşylar. Qazan, 1927» degen tüsındırmemen saqtalǧan. Fotoda Mūhammed İdrisovtıŋ esımı ǧana körsetılgenımen, beinelengen tūlǧalardyŋ ortasynda Ahmet Baitūrsynūlynyŋ beinesı aiqyn körıngen. Muzei mamandary alǧaşynda surettı tüsıruge rūqsat bermei, keiın kelısımge kelgen.
Qaiyrbek Kemeŋgerdıŋ aituynşa, Ahmet Baitūrsynūlynyŋ Qazan qalasynda būryn-soŋdy bolǧany turaly būǧan deiın aqparat aitylmaǧan.
«Ahmet Baitūrsynūly Qazan qalasyna keldı degen aqparatty būryn estımedık... «Kelgenı sözsız, mūny osy suret rastaidy» dep oi tüidık. Bır esepten, mūraǧat materialyna mūqiiat tatar aǧaiyn surettıŋ qaida jäne qaşan tüsırılgenı jaiynda olqylyq jıbere qoimas dep te oiladyq»,–deidı ol.
Ädebiettanuşy ūlt ūstazynyŋ 1927 jyldyŋ küzınde tatar ziialylarymen bırlesıp, arab alfavitın reformalau jönındegı komissiianyŋ müşesı bolǧanyn mälımdedı. Ahmet Baitūrsynūlynyŋ jūmysy jergılıktı «Maǧrifat» jurnalynyŋ 1927 jylǧy 12-nşı sanynda jariialanǧan.
«Bızdıŋ anyqtauymyz boiynşa, surettegı 22 adam arasynda Ahmet Baitūrsynūly jalǧyz qazaq. Tatar ǧalymy, oŋ jaq şette otyrǧan Mūhammed İdrisov pen Ahmet Baitūrsynūly aldynda ǧana qaǧaz bar. Būl jait ta ekı ǧalymnyŋ qalǧandarynan bäsı biık ekenın bıldıretındei. Ortadaǧy şaǧyn stolǧa ekı adam ǧana siiady. Ekı adamnyŋ bırı – Ahmet Baitūrsynūly. Aqaŋa üstel basynan, qūrmettı jerden oryn berılgen. Qazaq ǧalymy aiaǧyn da, qolyn da aiqastyryp jinaqy otyr. Jas mölşerı jaǧynan Aqaŋ barlyǧynan ülken sekıldı. Suret 1927 jyldyŋ küz mezgılınde tüsırılgen degen mälımettı anyqtadyq. N.Miftahutdinova 1927 jyldyŋ qazan, qaraşa ailary bolu kerek dep paiymdady. Aqaŋnyŋ jasy būl kezde 55 jastan asqan»,—dep tolyqtyrdy zertteuşı.
