بۇگىن، 17 قىركۇيەكتە اقش پرەزيدەنتى دونالد ترامپ ۇلىبريتانياعا جۇمىس ساپارىمەن بارىپ، بريتان مونارحى ءىىى كارل پاتشامەن كەزدەستى، دەپ حابارلايدى «ادىرنا» ءتىلشىسى.
بۇل – ترامپتىڭ پرەزيدەنت رەتىندە ۇلىبريتانياعا جاساعان ەڭ جوعارى دەڭگەيدەگى ەكىنشى ساپارى.
لوندونداعى ستانستەد اۋەجايىندا ترامپ پەن ونىڭ جۇبايى مەلانيانى اۋە كۇشتەرىنىڭ اسكەري قىزمەتكەرلەرى مەن ۇلىبريتانيا شەنەۋنىكتەرى، سونىڭ ىشىندە سىرتقى ىستەر ءمينيسترى يۆەتت كۋپەر قارسى الدى.
لوندون ماڭىنداعى ۆيندزور قامالىندا اقش باسشىسىن سالتاناتتى قارسى الۋ ءراسىمى ءوتتى. وعان 1000-نان استام اسكەري مەن 120 جىلقى قاتىسقان. ترامپتىڭ پاتشامەن جانە كورولدىك اۋلەت مۇشەلەرىمەن اڭگىمەسىنەن كەيىن سالتاناتتى بانكەت ۇيىمداستىرىلعان.
The Guardian گازەتىنىڭ جازۋىنشا، ۇلىبريتانيا بيلىگى ترامپقا كورسەتىلگەن قۇرمەت لوندون مەن ۆاشينگتون اراسىنداعى ەكونوميكا مەن قاۋىپسىزدىك سالاسىنداعى وداقتاستىقتى نىعايتۋعا كومەكتەسەدى دەپ ۇمىتتەنىپ وتىر.
دەسە دە، بىرقاتار بريتاندىق بەلسەندى مەن قوعام قايراتكەرلەرى ترامپتىڭ ساپارىنا قارسى نارازىلىق تانىتۋدا. لوندون مەرى ساديك حان ترامپتىڭ ساياساتى «قوعامدا ارازدىق تۋدىرادى» دەگەن مالىمدەمە جاسادى.
ايتا كەتەيىك، ترامپ پەن پرەمەر-مينيستر ستارمەردىڭ كەلىسسوزدەرى بەيسەنبى كۇنى وتپەك. كۇن تارتىبىندە ساۋدا ماسەلەلەرى، ءححى عاسىرداعى وزىق تەحنولوگيالار، اتوم ەنەرگەتيكاسىن دامىتۋ، ۋكراينا مەن گازا سەكتورىنداعى جاعداي ماسەلەلەرى بار.
