5 قىركۇيەك كۇنى الماتى قالاسىنىڭ اۋەزوۆ اۋدانىنداعى ياسساۋي كوشەسىنە جاڭا اسفالت توسەلگەن بولاتىن. الايدا العاشقى جاۋىننان كەيىن جول جابىنى وپىرىلىپ كەتتى، دەپ حابارلايدى «ادىرنا» ءتىلشىسى.
اكىمدىكتىڭ ءباسپاسوز قىزمەتى بۇل جاعدايعا تۇسىنىكتەمە بەردى.
«17 قىركۇيەك كۇنى تاڭەرتەڭ ياسساۋي كوشەسىنىڭ داستان كوشەسىمەن قيىلىسىندا جول جابىنىنىڭ شامامەن 100 شارشى مەتر اۋماقتاعى بولىگى وپىرىلدى. بۇعان دەيىن «سپەتسكوممۋنستروي» مەردىگەر ۇيىمى ۇزىندىعى 2,8 شاقىرىم بولاتىن كارىز جەلىلەرىن سالۋ جۇمىستارىن اتقارعان بولاتىن. جۇرگىزىلگەن تەكسەرۋ بارىسىندا نوسەر جاۋىن كەزىندە ابونەنتتىك جەلىلەر ترانشەيالارىنىڭ شايىلۋى جانە توپىراق نەگىزىنىڭ جۇمسارۋى انىقتالدى. سونىڭ سالدارىنان جول جابىندىسىندا ويىق پايدا بولىپ، اسفالتتىڭ تۇتاستىعى بۇزىلعان. قازىرگى ۋاقىتتا جول توسەمىن قالپىنا كەلتىرۋ جۇمىستارى جۇرگىزىلىپ جاتىر»،—دەلىنگەن حابارلامادا.
جوندەۋ جۇمىستارى 18 قىركۇيەكتە اياقتالادى دەپ جوسپارلانىپ وتىر.
«اتالعان جوبانىڭ تەحنيكالىق قاداعالاۋ قىزمەتى جۇمىستاردىڭ قۇرىلىس نورمالارى مەن ەرەجەلەرى جوبالىق تالاپتارعا سايكەس ورىندالعانىن حابارلادى. قازىرگى تاڭدا سەبەپتەردى انىقتاۋ ماقساتىندا قوسىمشا تەكسەرۋ جۇرگىزىلىپ جاتىر. ياسساۋي كوشەسىندەگى اسفالت جابىنىنىڭ ويىلۋ سەبەپتەرىن ناقتىلاۋ ءۇشىن قالالىق قۇرىلىس باقىلاۋ باسقارماسىنا سۇراۋحات جولداندى. سەبەبى توپىراقتىڭ دۇرىس نىعىزدالماۋى ىقتيمال نۇسقا رەتىندە قاراستىرىلىپ وتىر. ونىڭ ناقتى سەبەبى تەكسەرۋ ناتيجەسىندە بەلگىلى بولادى»،—دەپ تولىقتىردى اكىمدىكتىڭ ءباسپاسوز قىزمەتى.
