الماتى قالاسىنىڭ اكىمى دارحان ساتىبالدى حالىقتىڭ ءومىر ءسۇرۋ ساپاسىن ارتتىرۋعا جانە جاستاردى قولداۋعا باعىتتالعان الەۋمەتتىك ينفراقۇرىلىمدى دامىتۋ بويىنشا قابىلدانىپ جاتقان شارالار تۋرالى مالىمدەدى، دەپ حابارلايدى «ادىرنا» ۇلتتىق پورتالى.
قالا اكىمىنىڭ ايتۋىنشا، اكىمدىك ەڭ الدىمەن ءبىلىم بەرۋ ينفراقۇرىلىمىن دامىتۋعا باسىمدىق بەرىپ وتىر. 2025 جىلى الماتىدا 37,1 مىڭ وقۋشىعا ارنالعان 22 ءبىلىم بەرۋ نىسانى پايدالانۋعا بەرىلدى. قابىلدانىپ جاتقان شارالاردىڭ ناتيجەسىندە الداعى وقۋ جىلىنا قاراي وقۋشى ورىندارىنىڭ تاپشىلىعى ايتارلىقتاي قىسقارادى دەپ كۇتىلۋدە.
سونىمەن قاتار، دەنساۋلىق ساقتاۋ سالاسىنا بولىنەتىن قارجى كولەمى 2025 جىلى 25 پايىزعا ارتقان. وسىعان بايلانىستى مەديتسينالىق ينفراقۇرىلىمدى جاڭعىرتۋعا ەرەكشە كوڭىل بولىنۋدە. بيىل ەكى العاشقى مەديتسينالىق-سانيتاريالىق كومەك كورسەتۋ ورتالىعى مەن ءبىر ەمحانا سالىندى. بۇدان بولەك، 32 مەديتسينالىق نىساندى سالۋ جانە جاڭارتۋ جوبالارى پىسىقتالىپ جاتىر. جەدەل مەديتسينالىق جاردەم قىزمەتىنىڭ اۆتوپاركى 37 پايىزعا جاڭارتىلىپ، 50 جاڭا كولىك ساتىپ الىندى. جىل باسىنان بەرى انالار ءولىمى 48,2 پايىزعا، نارەستەلەر ءولىمى 5,4 پايىزعا، ال قاتەرلى ىسىكتەردەن بولاتىن ءولىم-ءجىتىم 16 پايىزعا تومەندەگەن.
دارحان ساتىبالدىنىڭ ايتۋىنشا، الماتى — جاستار قالاسى. وسىعان وراي، ولاردىڭ ءبىلىم الۋىنا، ەڭبەككە ارالاسۋىنا جانە قوعامعا بەيىمدەلۋىنە ەرەكشە نازار اۋدارىلۋدا. 2025 جىلى قالادا 11 كوميۋنيتي-ورتالىق جانە 4 «ناركو-STOP» ورتالىعى اشىلدى. سونىمەن قاتار، 33 مەكتەپتەن تىس بوس ۋاقىتتى ءتيىمدى ۇيىمداستىرۋ ورتالىعى جاڭعىرتىلدى. ستۋدەنتتىك جاتاقحانالاردا 8 مىڭنان استام توسەك-ورىن ورنى قۇرىلدى.
«الماتى جاستارى» باعدارلاماسى اياسىندا 2 200 وتباسىعا پاتەر كىلتتەرى تابىستالدى. قالادا 3 سپورتتىق-ساۋىقتىرۋ كەشەنى اشىلىپ، كوشە سپورتىنا ارنالعان 50 ينفراقۇرىلىمدىق نىسان سالىندى. قابىلدانعان كەشەندى شارالاردىڭ ناتيجەسىندە NEET ساناتىنداعى جاستاردىڭ ۇلەسى 8,3 پايىزدان 6,4 پايىزعا دەيىن تومەندەدى.
سونداي-اق جۋىردا الماتى قالاسىن دامىتۋدىڭ 2026–2030 جىلدارعا ارنالعان جوسپارى قابىلداندى. اتالعان قۇجات مەگاپوليستىڭ ورنىقتى دامۋىن قامتاماسىز ەتۋگە باعىتتالعان. جوسپاردا تۇرعىنداردىڭ ءومىر ءسۇرۋ ساپاسىن ارتتىرۋعا ىقپال ەتەتىن نەگىزگى باسىمدىقتار ايقىندالعان. اتاپ ايتقاندا، كولىك جۇيەسىن كەشەندى دامىتۋ، قولايلى قالالىق ورتا قالىپتاستىرۋ، الەۋمەتتىك تۇراقتىلىقتى نىعايتۋ، تسيفرلىق ترانسفورماتسيانى جەدەلدەتۋ جانە قالا قاۋىپسىزدىگىن ارتتىرۋ باستى باعىتتار رەتىندە بەلگىلەنگەن.
