ۇلتتىق قاۋىپسىزدىك كوميتەتى (ۇقك) ەسىرتكى كونترابانداسىنىڭ حالىقارالىق ارناسىن جويۋعا باعىتتالعان كوپ ساتىلى ارنايى وپەراتسيا جۇرگىزىپ، رەسپۋبليكا تاريحىنداعى ەڭ ءىرى كوكاين پارتياسىن تاركىلەدى، دەپ حابارلايدى “ادىرنا”.
وپەراتسيا ناتيجەسىندە الماتى قالاسىندا ءبىر رەتتىك سالماعى 13 توننا 183 كيلوگرامم بولاتىن كوكاين ەسىرتكى زاتى قولعا ءتۇستى. بۇل – ەلىمىزدىڭ قۇقىق قورعاۋ ورگاندارى تىركەگەن ەڭ ءىرى كولەمدەگى ەسىرتكى تاركىلەۋ وقيعاسى.
الىنعان جۇكتىڭ قازاقستان اۋماعى ارقىلى ءۇشىنشى ەلدەرگە ترانزيتپەن جەتكىزىلۋى جوسپارلانعانى انىقتالدى.
ەسىرتكى ارناسىن ۇيىمداستىرۋعا قاتىسى بار دەگەن كۇدىكپەن ەكى شەتەل ازاماتى ۇستالىپ، قاماۋعا الىندى. اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ 297-بابىنىڭ 3-بولىگى بويىنشا سوتقا دەيىنگى تەرگەپ-تەكسەرۋ امالدارى جۇرگىزىلۋدە.
سونىمەن قاتار، قر قىلمىستىق-پروتسەستىك كودەكسىنىڭ 201-بابىنىڭ 1-بولىگىنە سايكەس تەرگەۋ مۇددەسىنە بايلانىستى وزگە اقپاراتتار جاريا ەتىلمەيدى.
