وسكەمەن قالاسىنىڭ پروكۋرورى قىزمەتىنەن ۋاقىتشا شەتتەتىلدى. قازىرگى تاڭدا قىزمەتتىك تەكسەرىس ءجۇرىپ جاتىر، دەپ حابارلايدى «ادىرنا» ءتىلشىسى.
«شىعىس قازاقستان وبلىسىنىڭ پروكۋراتۋراسى الەۋمەتتىك جەلىلەردە تارالىپ جاتقان وسكەمەن قالاسى پروكۋراتۋراسى قىزمەتكەرلەرىنە قاتىستى اقپارات بويىنشا كەلەسىنى حابارلايدى. وسكەمەن قالاسىنىڭ پروكۋرورىنا قاتىستى قىزمەتتىك تەكسەرىس جۇرگىزىلۋدە. قازاقستان رەسپۋبليكاسىنىڭ «قۇقىق قورعاۋ قىزمەتى تۋرالى» زاڭىنا سايكەس، ول وزىنە قاتىستى جاۋاپتىلىق تۋرالى شەشىم قابىلدانعانعا دەيىن ۋاقىتشا اتقاراتىن لاۋازىمىنان شەتتەتىلدى»،–دەلىنگەن حابارلامادا.
وسكەمەن قالاسى پروكۋراتۋراسىنىڭ وزگە قىزمەتكەرلەرىنە قاتىستى مالىمەتتەر بويىنشا بۇعان دەيىن دە قىزمەتتىك تەكسەرىستەر جۇرگىزىلگەن. اتالعان ءمان-جايلاردىڭ ءبىر بولىگى راستالىپ، كورسەتىلگەن قىزمەتكەرلەر قىزمەتتىك ادەپ نورمالارىن بۇزعانى ءۇشىن تارتىپتىك جاۋاپتىلىققا تارتىلعان.
شىعىس قازاقستان وبلىسى پروكۋراتۋراسىنىڭ رەسمي دەرەكتەرىنە سايكەس، 2024 جىلدىڭ 7 ماۋسىمىنان باستاپ وسكەمەن قالاسىنىڭ پروكۋرورى قىزمەتىن تيمۋر شاقپانتاەۆ اتقارىپ كەلەدى. ول 1987 جىلى دۇنيەگە كەلگەن. قاەۋ-ءدى زاڭگەر ماماندىعى بويىنشا، ال س. امانجولوۆ اتىنداعى جوعارى وقۋ ورنىن ەكونوميست ماماندىعى بويىنشا بىتىرگەن. ەڭبەك جولىن 2011 جىلى ريددەر قالالىق پروكۋراتۋراسىندا باستاعان.
تيمۋر شاقپانتاەۆتىڭ اكەسى قايرات شاقپانتاەۆ شىعىس قازاقستان وبلىستىق سوتىنىڭ توراعاسى بولعان.
ەسكە سالايىق، بۇعان دەيىن ماس كۇيدە اۋەجايدا شۋ شىعارعان اقتاۋلىق پروكۋرور ەربولات ءابدىروۆ ۇساق بۇزاقىلىق جاساعانى ءۇشىن كىنالى دەپ تانىلعان بولاتىن.
