Air Astana اۋە كومپانياسى ۇشاعىنىڭ فيۋزەلياجىنان جارىقشاق تابىلدى. پروكۋراتۋرا تەكسەرىس جۇرگىزىپ جاتىر، دەپ حابارلايدى “ادىرنا” ۇلتتىق پورتالى قازتاگ اگەنتتىگىنە سىلتەپ.
2025 جىلعى 18 ساۋىردە Telegram-داعى «Berkut 001» ارناسىندا جاريالانعان اقپاراتقا سايكەس، مەملەكەت باسشىسىنىڭ تاپسىرماسىمەن كولىك پروكۋراتۋراسى مەن قازاقستاننىڭ اۆياتسيالىق اكىمشىلىگى اۋە قاۋىپسىزدىگى سالاسىندا كەڭ كولەمدى تەكسەرىس جۇرگىزىپ جاتىر.
اتالعان تەكسەرىس بارىسىندا Air Astana اۋە كومپانياسىنا تيەسىلى ۇشاقتىڭ فيۋزەلياجىنىڭ ارتقى جۇك بولىگىنىڭ ماڭىنان ەنى شامامەن 25 سانتيمەتر بولاتىن جارىقشاق انىقتالعان. وسىعان بايلانىستى ۇشاقتىڭ پايدالانىلۋى ۋاقىتشا توقتاتىلدى.
سونىمەن قاتار، Telegram ارناداعى جازبادا تەكسەرىسكە قاتىسىپ جاتقان لاۋازىمدى تۇلعالارعا قىسىم كورسەتىلىپ جاتقانى، ياعني قاۋىپسىزدىككە ۇلكەن قاتەر توندىرەتىن بۇل اقاۋدى ماڭىزدى ەمەس ەسكەرتۋ رەتىندە تىركەۋگە يتەرمەلەۋ ارەكەتتەرى تۋرالى دا ايتىلعان.
قازتاگ اگەنتتىگى بۇل مالىمەتتى باس پروكۋراتۋرادان راستاۋدى سۇراعان.
«مەملەكەت باسشىسى مەن باس پروكۋروردىڭ تاپسىرمالارىن ورىنداۋ ماقساتىندا تۇراقتى جولاۋشى تاسىمالدارىن جۇزەگە اسىراتىن اۋە كومپانيالاردىڭ قىزمەتىنە تەكسەرىس جۇرگىزىلۋدە. بۇل جۇمىسقا ۋاكىلەتتى مەملەكەتتىك ورگاندار مەن ۇيىمدار تارتىلعان. تەكسەرىستەردىڭ ماقساتى – ۇشۋلار قاۋىپسىزدىگى مەن اۆياتسيالىق قاۋىپسىزدىك سالاسىنداعى زاڭنامانىڭ ساقتالۋىن قامتاماسىز ەتۋ. قازىرگى تاڭدا جۇمىس جالعاسۋدا، ونىڭ ناتيجەلەرى بۇقارالىق اقپارات قۇرالدارى ارقىلى جاريا ەتىلەدى»، – دەلىنگەن پروكۋراتۋرا جاۋابىندا.
